لا مؤاخذة بأنام
جيت أحبك معلش أنا كسلت
عندى حاجات كتير إتأجلت
أستاذ البت على وصول
ولازم أروق الشقة
لأ ده الطبيخ أولى
يووه. لازم أهرش لابنى ف ظهره لأنه مقريف
ووقت نومه أزف
ولو ما نمش هتشوفنى بوشى التانى
خدوجة وزنوبة وأم محمد
ياه ده الحوض مليان مواعين وقزايز التلاجة
كلها فاضية
ياخبر دى البنت التانية إتأخرت
ومافيش عيش وخضار للسلطة
وكوتشى الواد عايز يتصلح
الغسيل على الحبل بقى له تلات تيام
عايزة أغير لبس الشغل ليتبهدل!
كفاية كرتون يابنى عايزة أسمع الأخبار
موبايلين بيرنوا..
بإيديا ورجليا وعينى وراسى
بأرد وأحل وأفكر
مش لاقيه براح حتى لنفسى
ويادوب بتبص فى عينى بحنية
بأروح فى النوووم
