جيهان السادات تتحدث عن الرئيس: "بيحب أفلام الكاوبوى"
في حوار سابق لها مع الإعلامي طارق حبيب، تحدثت الراحلة جيهان السادات عن هوايات الرئيس الراحل محمد أنور السادات.
الرئيس محمد أنور السادات
تقول جيهان السادات في معرض حوارها بمجلة الشبكة، عن الرئيس وفي إجابة لسؤال عن الموسيقى التي تفضلها ويفضلها الرئيس: "أحب الموسيقى مش الهادية، القديمة اللي زي بتاعة سيد درويش، وهو الريس بيحبها كده، دي بنتفق فيها، لكن أنا غاوية مثلًا أسمع عربي على طول، يعني أفضل دائمًا أن ودني تسمعها على طول".
وأضافت عن هوايات محمد أنور السادات: “أما عن الرئيس السادات فهو ساعات بيحب يسمع الموسيقى الكلاسيك الهادية لما بيكون بيفكر وذكرها معد البرنامج بأن الرئيس محمد أنور السادات كان يمارس هوايتي السباحة ومشاهدة الأفلام، وسألها عما إذا كان ما زال يمارسهما، فأجابت: "هو السباحة بالنسبة للريس لما يروح إسكندرية في الصيف يمكن ينزل البحر مرتين ثلاثة، مش كتير زي زمان طبعًا”.
جيهان السادات تتحدث عن الرئيس
وتابعت عن عشق الرئيس محمد أنور السادات للسينما: "أما عن السينما لغاية النهارده ما فيش يوم يعدي من غير ما يشوف فيلم، دي بقى من الحاجات اللي إحنا بنختلف فيها، أنا مقدرش أشوف سينما كل يوم، الريس لازم يشوف سينما كل يوم، ليه؟. لكنه هو باستمرار تفكيره بيشتغل، يعني باستمرار بيفكر في أحداث وحاجات، دايمًا في راسه تفكير مستمر ما ينقطعش، فبيحس إن فيلم السينما بياخده إلى حد ما، أو بيريح التفكير ده لفترة، علشان کده بيشوف كل يوم فيلم".
واختتمت جيهان السادات: "وهو غاوي أفلام الكاوبوي، وأنا بقى مقدرش أشوفها، هو يشوفها وأنا أقعد عشر دقايق، أول ما ألاقي الأحصنة جريت والتراب طلع أروح قايمة على طول منسحبة".
