دي حاجة 13 خالص.. علي الكسار يتصدر المشهد بعد 87 عاما
أثار مسلسل "عمر أفندي"، بطولة الفنان أحمد حاتم، والنجمة آية سماحة، جدلا واسعًا بعد نجاح جماهيري كبير حققه بعد عرض حلقاته على قناة "أون"، التابعة للشركة المتحدة للخدمات الإعلامية.
مسلسل "عمر أفندي" اعتمد أحداثه على الحالة المصرية في زمن "الأربعينات" والتي امتازت بالبساطة واللباقة والهدوء، والمصطلحات الغريبة والتي علقت بأذهان جمهور الألفية الجديدة، وكان أبرزها "حاجة 13".
"حاجة 13 خالص" تُثير جدلأ
وتسببت جملة "حاجة 13" في جدل واسع بعد انتقاد الفنان علي الطيب، لأبطال العمل، معتبرهم تجاهلوا سبقه في البحث عن جمل ذلك الزمان وخاصة جملة "حاجة 13"، إذ أكد أنه سبقهم في استخدامها في أحد أعماله.
وتساءل الفنان علي الطيب عن سبب عدم إشارة نجوم مسلسل عمر أفندي لشخصية "البساطي" والتي قدمها علي الطيب في مسلسل "أهو دا اللي صار" وذلك عند استخدام جملة "حاجة 13 خالص" والتي كان يرددها "البساطي" في المسلسل.
وكتب عبر صفحته: "حابب أبارك لكل زمايلي في عمر أفندي على نجاحهم بجملة وديع البساطي المشهورة (دي حاجة 13 خالص)".
وتابع: "واستنوا على الجزء التاني لغاية ما أفكر لكم في الجديد منه، عشان تعرفوا تقلدوه تحياتي للي نجحوا بمصطلحاتي، وطول عمرها اللعبة ليها أصول، وبنتعلم من بعض، مش بنعلم على بعض، أهو ده اللي صار، وديع البساطي".
حذف المنشور
وتفاجأ جمهور الفنان علي الطيب، بحذف المنشور الذي أثار جدلا واسعا، وكتب علي الطيب عبر حسابه الشخصي على “فيسبوك”: “تم حذف البوست والأسباب هي: أنا ممكن أكون عبرت بشكل يزعل زمايلي من اللي اتكتب بس هما زعلوني بأنهم مذكروش في أي برنامج أو أي لقاء أنهم اقتبسوها من وديع البساطي في مسلسل أهو ده اللي صار، مصطلح موجود في مصر زمان فعلًا مش أنا اللي اخترعتها، بس بيبقى كل ممثل بيبذل مجهود من أجل الشخصية تبقى لحم ودم مش كلام على ورق فقط وبيقول كلامه وخلاص، وده كان جزء من مجهودي اللي تم أثناء تحضير الشخصية في المسلسل وبعد ما عرضت بعض المصطلحات على الأستاذ السيناريست عبدالرحيم كمال والأستاذ حاتم علي عليه رحمة الله”.
وتابع: “اخترنا اللي يتناسب مع الشخصية التي تعبر عن شخصيته واتوظف في الحوار بشكل مناسب ومنطقي للمشاهد من الأستاذ عبدالرحيم، واتعرض المسلسل وربنا كتب لنا القبول في قلوبكم، ونجح المسلسل واتشهرت شخصية وديع البساطي بمصطلحاتها اللي تعتبر كانت جديدة على الجمهور رغم أن الجملة ليها أصل ومعنى ووضحناه في المسلسل، وأظن احنا في مهنة واحدة يعني عارفين شغل بعض ونعرف بعض كويس وبينا كل خير، لا يمكن يجيلي عمل فني أو اسكريبت واكتشف أن في جملة أو مصطلح مشهور لزميل ليه ونجح بيه وأكرره أو اتجاهل مجهوده هو وصناع العمل واحترم نجاحه”.
وأضاف:" حق كل فنان يغير ويبقى نفسه يعمل شخصية حلوة ويستمتع بأدائها المشاهد، وده حق شرعي بس أظن أن التميز هنا هيكون في الاختلاف والاجتهاد المطلوب منك وليس الاستسهال، ولنفرض حصل وقولت مصطلح يخص شخصية فنيه لعبها زميل ومتفرجتش عليه أو مافيش حد نبهني.. يبقى أقل واجب بعد عرض المسلسل وعرفت المعلومة يبقى أقل حق سواء كتاب العمل أو أنا كفنان أوضح في أي لقاء في أي برنامج أنه تم الاقتباس من العمل الفني اللي قبلنا، ووقتها مش هيكون ليه حق ازعل وأفهمها تجاهل من زمايلي لأني غصب عني مفهمتهاش غير كده".
وواصل: اللي يعرفني كويس عارف إني دايما مبتأخرش عن زمايلي وبفرح لنجاحهم من قلبي ولا عمري نفسنت ولا اتكلمت في تفاصيل شبه دي، بس الموضوع لو مكنش يخصني كنت هقول كلمة حق في حق الزميل اللي سبق ونجح بشخصية وبمصطلحاتها اللي علمت مع الجمهور بفضل ربنا، واحنا اللي بينا كل خير وصحاب وإخواتي وعلى راسي وربنا يعلم أنهم غاليين عندي بس حسيت أني مش شرط يكون زعلي من تجاهلهم يفرق معاهم.. فا محبتش اسيب الموضوع يكبر وتاخد اتجاه مش لطيف، وطلبت من الشباب المسؤولين عن الصفحة تحذف البوست لأن العتاب والهزار هيقلب جد لحد ما اكتب بوست أوضح فيه وربنا ما يجيب زعل ولا مشاكل.. وعلى رأي البساطي الفنان أناني ومش عيب.
لقاء أبطال مسلسل عمر أفندي في "معكم"
وأشار أبطال مسلسل “عمر أفندي” خلال حلقة برنامج "معكم" مع الإعلامية منى الشاذلي، لشخصية "البساطي" ولجملته الشهيرة، مما جعل الفنان علي الطيب يقدم على اعتذار لابطال العمل عبر حسابه الشخصي على الفيس بوك.
وتفاعل "الطيب" مع حديث أبطال العمل، وكتب علي الطيب عبر مواقع التواصل الاجتماعي: “شكرا من القلب لصديقي المحترم أحمد حاتم على توضيحه في حلقة الأستاذة منى الشاذلي وده العشم يا أحمد يا ابن الأصول.. على راسي تقديرك ليه وعتابي في الأول عشان أكون واضح كان للي كتبوا المسلسل وأن كل الممثلين في عمر أفندي صحابي وعشرة عمر وهرجع أقول مافيش بينا غير كل خير.. وأنا بعترف إني مندفع لما بكون على حق”.
وتابع: “بس مش طول الوقت ينفع نعبر عن اللي مضايقنا حتى لو على حق وأوقات كتير الصمت بيبقى أفضل.. شكرا يا حاتم مرة تانية وأنت عارف غلاوتك عندي وأي كلام صدر على صفحتي مكانش يخصك خالص.. لأني لو زعلان منك شخصيا كنت كلمتك على طول وربنا يكرمك دايما ويكتب لك الخير”.
رد مؤلف "عمر أفندي"
رد المؤلف مصطفى حمدي، مؤلف مسلسل "عمر أفندي" على الجدل الذي أثير بسبب جملة "حاجة 13 خالص" وإشارة الفنان علي الطيب إنه استخدم هذه الجملة في مسلسل "أهو دا اللي صار" قبل سنوات.
وقال مصطفى حمدي خلال لقائه في برنامج "أسرار النجوم" من تقديم إنجي علي عبر إذاعة "نجوم FM": "علي الطيب هو فعلا طيب على المستوى الشخصي إنسان كويس ومش شرير لكن التبس عليه الأمر، الجمل دي هي اتقالت في أفلام موجودة وكانت بتتقال في الفترة الزمنية ومع الوقت اندثرت".
وتابع: "اللي حصل هو قالها في عمل وإحنا قلناها في عمل زي كلمات "سعيدة" و"ممنون"، هو علي الطيب اتضايق وأنا مش عارف اتضايق ليه هي مش ملكية فكرية أو خاصة لحد جملة بتتقال في الزمن دا، بعد كده هكتب صباح الخير واستأذن الممثل اللي قال صباح الخير لأنه قالها في مسلسل تاني، أنا عارف إن علي طيب ومكنش يقصد الجدل والمشاكل اللي حصلت ومتزعلش يا علي".
علي الكسار صاحب "حاجة 13"
وتعرض على الطيب، لهجوم رواد مواقع التواصل الاجتماعي، نظرًا لأن البعض استعاد مشهدًا قديمًا للفنان الكبير نجيب الريحاني في فيلمه "سلامة في خير" من إنتاج سنة 1937، وكان يُردد فيها تلك الجملة تعبيرًا عن إعجابه بالغرفة في مشهد الفندق، مما يحسم الجدل حول من هو أصل "حاجة 13 خالص" في الأعمال الفنية العربية.
مسلسل أهو ده اللي صار
"أهو ده اللي صار" عرض عام 2019، من تأليف عبد الرحيم كمال، وإخراج المخرج الراحل حاتم علي، وبطولة كل من روبي، ومحمد فراج، وأحمد داوود، أروى جودة، سوسن بدر، علي الطيب، هشام إسماعيل، ومحمود البزاوي، وهبة عبدالغني، إلهام عبد البديع، عماد إسماعيل، وعدد كبير من النجوم.
مسلسل عمر أفندي
مسلسل "عمر أفندي" بطولة أحمد حاتم، رانيا يوسف، آية سماحة، مصطفى أبو سريع، محمد رضوان، ميمي جمال، ومحمود حافظ، ميران عبد الوارث، إسماعيل فرغلي، والمسلسل من تأليف مصطفى حمدي، وإخراج عبد الرحمن أبو غزالة.
