الباز: التنمر على "أبطال الأوليمبياد" توحش أخلاقى وتصفية

تحدث الإعلامي الدكتور محمد الباز، رئيس مجلسي إدارة وتحرير جريدة "الدستور"، عن أزمة البعثة المصرية في أوليمبياد باريس 2024، قائلًا: "مش هتكلم في الرياضة ولكن هتكلم عن أخلاقنا في التعامل مع الأحداث الرياضية".

وأضاف "الباز"، خلال تقديم برنامج "مش حسبة برمة" عبر إذاعة "نغم إف إم": "مصر مشاركة في أوليمبياد باريس وعندنا ناس كويسة، ولدينا الفريق الأوليمبي لكرة القدم والناس مستبشرة به، ومنتخب اليد كان رائعًا، لدرجة أن المنتخب الفرنسي كان يحتفل بالتعادل معه، نظرًا لقوة الفريق المصري، وخاصة أن فرنسا صاحبة الأرض".

وتابع: "لدينا مشكلة ضخمة، أن مصر تعيش مرحلة من التوحش الأخلاقي، لما يبقى في حد في مشكلة أو أزمة بنلاقي حالة انقضاض وتصفية له، وهذا ما حدث مع لاعبة الملاكمة بسبب وزنها الزائد 700 جرام، وندى حافظ، والتي خرجت من الدور الـ16".

وواصل: "هنتفق أو نختلف حول الوزن، لكن الغلط لا يبرر، ولو حد طلع يهبل على الناس مينفعش، إنما بنتكلم عن مشكلة التوحش الأخلاقي، خليك لطيف وإنت بتعرض رأيك، هتلاقي ناس لا ليها في الطور ولا في الطحين ومش متابعة أوليمبياد وبتتكلم".

واستطرد: "واللي يقولك لاعيبة البعثة بتتأثر، لأ هو حضرتك إنت مفروض كنوع من أنواع الالتزام إنك تمنع اللاعيبة من إن هما يتفاعلوا مع السوشيال ميديا، ليه مبناخدش الأمور بجدية، وهذا ما ينقص المصريين، لا بد أن تكون هناك جدية، في كل الأمور".

وعن حملات التنمر التي طالت لاعبي البعثة المصرية، قال الباز: "بتلاقي غل وسواد طالع وليه نوصل لهذه المرحلة، ليه ننصب نفسنا قاضي وجلاد وتهين الناس وتسخر منهم، وكأنك مش شايف البشر قدامك بتحس؟، عندنا دكتورة ندى حافظ لها قيمة وذو شأن، ومحدش له شأن في إنها لعبت وهي حامل، هو الجنين ده مأجراه ده طفلها، وهي لو كانت شافت خطورة عليه مكنتش هتلعب".

وتابع: "أتمنى الحدث ده يفوق الناس شوية، ويقول للناس بلاش نتدخل كمان في نوايا الناس، لأن كمان الناس قالت هي راحت هناك عشان ابنها ياخد الجنسية الفرنسية، ربنا يعافينا من كل تلك المعاني المتوحشة".