غزة تكشف الحقيقة
رغم الوجع والألم والأسى وسقوط شهداء من أطفال ونساء وكبار السن، ورغم العجز اللي إحنا حاسين بيه، لكن في حاجات حصلت من أول يوم هجوم علي غزة، وهى إننا شفنا العالم علي حقيقته المختلفة تمامًا عن اللي كنا شايفينه.
العالم اللي كنا فاكرينه مؤمن وبيدافع عن حقوق الإنسان والأطفال، الغرب اللي صدرلنا إن هو الوحيد اللي يملك كل شيء من علم وقوة ومبادئ، العالم اللي نجح يخلينا نمشي وراه معميين، نجحوا يخلونا نلبس اللي هما عايزينه، وناكل اللي هما عايزينه، ونربي ولادنا بالطريقة اللي هما عايزينها، ونشوف الحياة بطريقتهم، حتي شكلنا متحكمين فيه، وبنشتري كل حاجة منهم هما، وأقنعونا إن أحسن جودة عندهم هما بس.
هما أحسن في كل حاجة، وإحنا أوحش في كل حاجة.. إحنا فاشلين وعاجزين، وهما الأنجح والأقوى.
خلونا طول الوقت حاسيين إننا معندناش إنسانية، ودينا ملوش لازمة، خلونا خايفين نقول ديانتنا عشان منطلعش إرهابيين رجعيين.
خلونا نتكلم بلغتهم، ونعيش بحضارتهم الزائفة، ونعيش بأخلاقهم، ونغني أغانيهم، وننبهر بأفلامهم اللي بتصدرلنا طول الوقت الأفكار اللي عايزين يغرسوها جوانا.
بقينا فاشلين، جهلة، عبيد ليهم بكل كيانا.. قدروا ينسونا أصلنا، لكن الحرب الأخيرة علي غزة بوجود كل وسائل التواصل الاجتماعي وإعلامهم ومنصاتهم ظهرت الحقيقة كاملة.
إحنا اللي عندنا إنسانية ورحمة وأصل وتاريخ وحضارة، نسينا إحنا مين، وإتفاجئنا أننا كل حاجة عايشين عليها بتاعتهم هما، كل فلوسنا رايحة عليهم.
لما جينا ندور علي بدائل منتجات المقاطعة، عرفنا ليه إحنا اقتصادنا واقع، وده مش بسبب إننا عاجزين أو فشلة زي ما بيحاولوا يفهمونا، ده بسبب إنهم غيبونا، وخلونا ننشغل بحاجاتهم هما، ولو حبينا نشتغل هنشتغل عندهم هما في مصانعهم هما.
وحقوق الإنسان اللي بيتكلموا عنها ليل ونهار طلعوا آخر ناس بيعملوا بيها حاجة، هما قالوها واعترفوا بيها، إننا حيوانات بشريةو وهما اللي بني آدمين، بيدوسوا علينا بجزمهم، الفرد الواحد عندهم ليه تمن، وإحنا بنعد أرقام بالجملة ومش عارفين نتحرك عشانهم.
ولما شعوبهم نزلت تتظاهر ضدهم كلنا شفنا التعامل معاهم كان إزاي.
الحرب دي فوقتنا، وقدرت تنقل التاريخ للأجيال الجديدة، وعرفنا إنها معركة وعي وإيمان قبل أي حاجة، وعي بتاريخنا وبأصلنا وبحقيقتنا وبحقيقتهم وإيمان بالقضية وبكلام ربنا.
العالم كله شاف المقاومة في فلسطين صنعت أسلحة إزاي، برغم كل الظروف القاسية والعدوان والمجازر عليهم، قادرين ينظموا نفسهم، إزاي، وبأقل الإمكانيات، في المستشفيات بيعملوا ايه.. أطفالهم بتربيتهم قادرين يواجهوا ويصمدوا إزاي.
إحنا أقوي من الغرب وأذكي وأمهر، إحنا بس كنا مغيبين، وجه الوقت اللي نتغير فيه، ونفكر فيه بشكل مختلف.. محتاجين نفوق، ونبقي إحنا مش حد تاني، محتاجين نصنع حاجتنا بنفسنا ونشتغل علي اقتصادنا، محتاجين نقوي إيمانا بربنا وبنفسنا، محتاجين طول الوقت نوعي نفسنا والأجيال الجديدة بالتاريخ والحاضر ومنسمحش تاني لحد يغيبنا.
اللي بيحصل دلوقتي من وعي وفوقة لكل الأجيال عظيم، الأغلبية العظمي إن مكنش الكل بيستخدم مهاراته في نشر الحقيقة بكل لغات العالم، وبكل الطرق، وده أقوي وقت اتنشرت فيه الحقائق، واتفضحت فيه أكاذيب الصهاينة والغرب علينا.
أنا فخورة بكل الشباب والأجيال الحالية اللي فضل طول الوقت بيتقال عليه جيل تافه، وهو مش تافه دول طلعوا مشاريع أبطال.
