ياسمين غيث تطمئن جمهورها: «عارفة إنكم قلقنين عليا»
حرصت الفنانة ياسمين غيث على طمأنة جمهورها بعد إجرائها جراحة دقيقة بإزالة ورم بالقفص الصدري، وذلك خلال الفترة الماضية.
وشاركت ياسمين منشور لها عبر انستجرام، وعلقت قائلة: "عارفة إنكم قلقانين عليا و مش عايزة اتأخر عليكم أكتر من كدة رغم تعبي لسه، مبدئياً ده شكلي معظم الـ5 شهور اللي فاتوا.. من شهر ١١ حتى الآن.. الحمد عملت العملية يوم ٦/٢ (عملية open chest لإزالة ورم حجمه ٨ سم+)
الحمد لله ألف حمد وشكر طلع حميد و طلع إنه كتلة من الغدة الدرقية وده هيحتاج إني أعمل فحوصات وcheck up علي الغدة كل ٣ شهور، ده طبعا غير الـ general check up اللي بعمله كل ٦ شهور الحمد لله علي كل حاجة.عاملة إيه؟ تعبانة.. حاسة بإيه؟ ألم لا يحتمل.. في عضمي، في ضلوعي، في أعصابي.. بس كده؟".
وتابعت: "لأ.. العملية مكانها صعب و الفتح في عضم الصدر المه مش طبيعي، بس أي إنسان عادي بيحس بالألم ده بطريقة معينة لكن أنا إيه اللي بيحصل معايا؟ أنا من ٧ سنين عملت عملية الـ breast cancer اللي شالوا فيها من صدري اليمين جزء من العضلة، ومعظم الغدد (lymph nodes) اللي تحت الذراع وده أثر من وقتها على ذراعي اليمين وفضل كذا شهر بيوجعني وبعد كدة كمّل معايا التنميل والوجع بس محتمل.
بعد العملية الأخيرة، فهمت إن الفتح في نص القفص الصدري والقطع في العضلة دي والعضم والأعصاب، بيأثر علي الذراعين، لأن معظمقوة حركتهم بتكون من عضلة الصدر.
أضافت: “فضلت نحو أسبوعين مش عارفة أستخدم إديا الإتنين خالص، شوية بشوية مع العلاج الطبيعي بقيت عارفة أستخدم الشمال في حاجات بسيطة و اليمين برده لأ و الألم في ضلوعي و دراعي و كتفي و رقبتي اليمين غير محتمل لدرجة إن الدكاترة بيدوني مسكنات جدول لازم يدوهالي من المستشفي.. لغاية ما الدكاترة قالولي للأسف نصك اليمين بدراعك اليمين هيكون متأثر أكتر بسبب عملية الـbreast cancer القديمة اللي أصلا سايبة أثر علي ذراعك فمعلش مافيش حل غير إنك تستحملي و تاخدي مسكنات للألم و علاج طبيعي لغاية ما يرجعلك الـ range of motion و الإحساس تاني بنسبة كبيرة. الحمد لله علي كل حاجة، بس قلت أحكلكم كدة و ده ملخص لتفاصيل كتييييير قوي صدقوني منها إني بيغمي عليا من الوجع و غيره”.
وأوضحت: “أنا مش بحب أحط صور كدة بس حبيت أعرفكم المرة دي أنا في إيه و بعدي بإيه و شكلي عامل إزاي حاليا و الجرح شكله إيه علشان ماتتخضوش لما تشوفوني لأن أنا من كتر وجع الجرح كمان والـirritation اللي فيه مش بستحمل هدوم عليه فحتي في عز البرد بكون مش حاطة أي هدوم عليه علشان مش بستحمل. فماتخافوش من شكله”.
واختتمت: “ادعولي أرجع زي الأول، أنا بقالي ٥ شهور عملت فيهم ٤ عمليات بين المستشفيات والعناية المركزة والدكاترة والفحوصات وأوجاع لا تحتمل والله، ادعولي علي الأقل أرجع أعيش من غير ألم تاني.. أنا الحمد لله بتحسن بالعلاج الطبيعي بس ببطء شوية”.
