أزمة شيرين
بخصوص أزمة شيرين وانهيارها النفسي، استوقفني بعض ردود الفعل من الناس، ومنهم إعلاميون وشخصيات عامة كمان، بيقارنوا حالة شيرين بفنانات تانيين اتعرضوا لتجربة الطلاق وواقفين على رجليهم ومكملين حياتهم ونجحوا فيها!
بلاش مقارنات، مينفعش أصلا نقارن بين حالة والتانية.
انتوا متعرفوش إيه اللي مر بالشخص لحد ما انهار.. متعرفوش هو قاوم قد إيه وحاول ينقذ نفسه كام مرة وحاول يتمسك بقوته، ده كمان ممكن يكون إتعرض لمواقف أصعب وقع فيها من غير ما حد يشوفه وقوّم نفسه بنفسه ومحدش شاف أبداً لحظات الانهيار دي.. بس لو حصل حاجات تاني وخصوصا لو مع شخص مؤذي عارف إزاي يهد الشخصية اللي قدامه بالتدريج مع الانهيارات المتتالية ومع أكتر من خبطة في الدماغ خلاص الإنسان بيفقد توازنه تماماً وبيفقد نفسه أصلا مبيبقاش عارف هو بيعمل إيه!
كل واحد بيقول أنا لو إتحطيت في الموقف نفسه هعمل وهسوي وعمري ماهعمل كده! انت متعرفش حاجة.. إوعى تقول كده عشان كلنا عايشين بستر ربنا.. انت واقف من بعيد وانت قوي وسليم وبكامل أسلحتك وبتقول انا لو المركب غرقت بيا هعوم لحد البر.. انت عارف المركب هتغرق بيك وانت في أي حالة؟ طب انت عارف ظروف البحر وقتها؟ عارف هتواجه إيه؟ عارف طاقتك تخليك تقاوم لحد مسافة قد إيه بأسوأ حالة للبحر؟
ليه الناس فاكرة إن الشخص المؤذي بيقول مساء الخير انا مؤذي؟ أو مع كل أذية ليه بيعترف إنه مؤذي وهو اللي عمل فيه كده وبيخاف لما بيتكشف؟ ومش كل شخص اتعرض لأذية يقدر يهرب بسهولة من المؤذي.
الشخص المؤذي بيدمر شخصيتك بشكل تدريجي وممنهج لحد ماتفقد كل قواك العقلية.. ومش لازم يكون عارف على فكرة ما المؤذي ده في الأغلب بيكون عنده اضطراب في الشخصية "سيكوباتي".. بيدخل حياتك بشكل رائع لحد مايسيطر على مشاعرك.. وواحدة واحدة في طلباته يخليك تتنازل عن كل حاجة.. مرة بالحب ومرة بالمسكنة ومرة بالخداع وأحيانا بفرض السيطرة لو التوقيت والرصيد يسمح!
ومع كل مرة يؤذيك فيها بينكر، يشككك في نفسك أو يجيب اللوم عليك ويحسسك بالذنب وإنك إنت اللي أذيته مش العكس، فيخليك تعتذر برغم إنه هو اللي أذيك.
ولو مع الوقت اكتشفت ممارساته معاك، الأسلوب هيبتدي يتغير لأشكال كتير.. المهم إنه يخليك تفضل موجود متهربش ويفضل يديك أمل في التغيير، وكمان يرمي عليك المسئولية في تغييره، فيخليك تنصاع لرغباته عشان تخلص وتجيب آخره يمكن كل ده ينتهي!
كل ده وأكتر كمان، بيدخلك في حالة شكوك مع نفسك وبتبقى في حرب نفسية صعبة أوي .. وعندك ألف سؤال عكس بعض جوه دماغك، ومع الوقت أكتر ممكن إنت كمان تتحول تبقى عدو نفسك وتساعده على أذيتك وانت مش واعي.
ولو أيقنت بعد كل التدمير ده إنك في مأزق كبير ومحتاج تقف عشان تطلب مساعدة.. الموضوع مبيبقاش بالبساطة دي، خصوصا لو في ظروف محيطة تانية ضدك، وكمان عشان من ضمن الأذية إنك تخسر أهلك وصحابك وشغلك وبتبقى متخيل انك مش هتقدر تكلم حد فيهم تاني.
ممكن وقتها حسب دماغك اللي اُستهلكت تماما ومش في حالة كويسة أبداً تفكر في حاجات عمرها ما كان يخطر علي بالك انك تفكر فيها.. زي انك تموت نفسك عشان ترتاح من الألم.. أو تلجأ لحاجات بتريح بشكل مؤقت ومع التكرار بتدمنها.. بتنهار وبتتصرف بأشكال متخيلتش للحظة انك ممكن تعملها، مش شخصيتك أصلا، وده حقيقي عشان خلاص انت اتحوّلت.
فبلاش أرجوكم نلوم أي ضحية وصلت لأقصى مراحل التدمير النفسي ونقولها ما فلانة اتطلقت وزي الفل هو إيه الضعف ده؟
المشكلة مش في الانفصال ولا الطلاق ولا مشاكل بين اتنين مرتبطين.. الموضوع حقيقي أكبر من كده، وده بيحصل لناس كتير حوالينا بتتهموهم بالضعف وبتسلوخهم بكلام مؤذي عشان انهاروا قدامكم بعد صراع طويل إنتوا متعرفوش عنه حاجة!
محدش كبير على الغلط، محدش كبير على تحمل الأذية، وصدقوني محدش بيختار شكل انهياره بيكون عامل إزاي.
