عروس الإسماعيلية: «اتهددت بالقتل».. ومفيدة شيحة: «مش هقدر أتعاطف معاكى»

الأحد 09/أكتوبر/2022 - 05:45 م

فجرت مها محمد عروس الإسماعيلية، مفاجأة عن الفيديو الذي صورته يوم الصباحية قبل 8 أشهر بعد اشتعال السوشيال ميديا بسبب تعرضها للسحل من قبل عريسها يوم الفرح، قائلة إنها كانت مهددة.

عروس الإسماعيلية تكشف عن تعرضها للتهديد ومحاولتها الانتحار

وقالت مها، خلال مداخلة هاتفية مع الإعلامية مفيدة شيحة، ببرنامج "الستات" المذاع على قناة النهار: "كنت مهددة وخائفة على أهلي، اتهددت بمياه نار واتهددت إن والدي يتقتل واخواتي يتأذوا، استحملته 8 شهور عشان أهلي، ولما اتحبست 15 يوما، ونزفت من بطني ومن زوري، ووصلت لدرجة فكرت في الانتحار، مقدرتش أستحمل".

وأضافت: "أنا مقلتش إنه حب 15 سنة، ده كلام أخوه، وأنا استحملت 8 شهور سحل وضرب وشتيمة، وكسر تليفوني، كنت بتضرب وبتشتم، وبأستحمل قلت جوازة وتمت وهحاول أتأقلم مع العيشة، لحد ما أبويا شافني مضروبة ووشي وارم، هو اللي نجدني".

مفيدة شيحة تنفعل على عروس الإسماعيلية

وانفعلت الإعلامية مفيدة شيحة على الهواء، قائلة: "لما الناس شافوكي بتتسحلي، في ثوانى كل مصر وقفت وقالت لو عايزة مساعدة هنساعدك، ليه استحملتي إهانة وضرب وشتيمة، ليه مش قبل كده زي ما عملتي النهاردة؟ أنا مش هاقدر أتعاطف معاكي عشان استحملتي 8 أشهر إهانة، قولنالك ده هيحصل واخرجي، في قانون، أرفض أي ست تقول أنا كنت متهددة، كان ممكن تاخدي الخطوة دي زي ما أخدتيها دلوقتي".

وكشفت العروس، عن أن النائب العام طمأنها، بعد أن طلبت الأمن لها ولوالدها ولإخوتها، مردفة: "قال لي محدش هيقدر يتعرض لك، وهو محبوس".

تحرير محضر ضد عريس الإسماعيلية

وحررت مها محمد، عروس الإسماعيلية، أمس محضرًا ضد زوجها، بعد مضي 8 أشهر من واقعة اعتدائه عليها ليلة زفافها وهي بفستان الفرح.

وكشفت وزارة الداخلية، اليوم الأحد، عن تفاصيل القبض على عريس الإسماعيلية، وقالت في بيانها إنه تبلغ لقسم شرطة ثان الإسماعيلية من سيدة، بتعدي زوجها عليها بالسب والضرب وإحداث إصابتها بجروح وكدمات متفرقة بالجسم، بسبب وجود خلافات زوجية بينهما، وعقب تقنين الإجراءات تم استدعاء المشكو في حقه، وبمواجهته اعترف بارتكابه الواقعة.