لماذا أغلب النساء فى ملاوى محجبات؟.. على غزلان يوضح
رد علي غزلان البلوجر الشهير، على سؤال أحد المتابعين له وهو: "لماذا جميع النساء في ملاوي بإفريقيا محجبات".
وقال غزلان: "أغلب الستات الموجودين هنا في ملاوي بيلبسوا الحجاب (سواء مسلمين أو مسيحين أو يهود) لأن كلهم مش بيبقي عندهم شعر، أو شعرهم قصير .. فبيداروه بالحجاب أو لفافة الشعر، وده نوع من أنواع الثقافة هنا..الميسورين الحال شويه بيلبسوا باروكه عشان يداري شكل شعرهم ".
وتابع: "ثانيًا قبل نطق الشهادة، في ناس دعاة بيقعدوا معاهم يوم أو يومين يكلموهم عن الدين أكتر وأركانه وبيجهزوهم للشهادة .. وبعد كده الدعاة بيتابعوا معاهم بصفة دورية وبيعملولهم دروس دين، وبما أن في تبرعات دائمًا وعمل خير موجود فى الأماكن دي فلما القريه يبقي فيها عدد مسلمين كتير أهل الخير بيبنولهم مسجد.. وربنا يتقبل منا ومنكم ويشرح صدرنا كلنا".
وكان قد نشر علي غزلان زيارة له من ملاوي في إفريقيا، مؤكدًا أن هذه الطبقة تعيش تحت خط الفقر.
وقال في منشور زيارته: "كنت بشوف فيديوهات للناس في ملاوي بإفريقيا قد إيه فقيرة .. لكن لما رحت هناك اكتشفت ان الفيديوهات مش ظاهرة الحقيقة كاملة، الناس دي تحت خطر الفقر بأميال ضوئية …أبسط حقوقهم في المية مش موجوده … عشان يشربوا ميه .. بيمشوا مسافات بعيدة وبيتجمعوا عند بركة ميه مليانة تراب وطين وأمراض وحشرات وبيعبوا منها الميه ويرجعوا للقرية بتاعتهم يشربوا ويطبخوا ويغسلوا بالميه دي … عشان كده امراض زي الملاريا والحمي الصفراء منتشرة جدًا عندهم.. عايشين في بيوت غير آدمية، مفيش غير أكلة واحدة بياكلوها اسمها (سيما ) ودي عبارة عن قمح مطحون جوه ميه مغلية".
