جمهور السوشيال ميديا يتفاعل مع حلا شيحة:«تامر مالوش ذنب.. ونسأل الله لك الهداية»
حالة من الجدل اثارتها الفنانة حلا شيحه بعد هجومها على كليب يجمعها بالفنان تامر حسني من فيلم “مش أنا” لاحتوائه على مشاهد رومانسية، لتكتب عبر حسابها الرسمي بموقع “انستجرام” منشورا تهاجم فيه الفيلم تتبرأ منه قائلة:"أنا اتفاجئت جدا بنزول كليب يجمع فيه مشاهد متفرقة من الفيلم وخصوصا بعد آخر بوست نزلته ووضحت فيه انا ايه ..واتفاجئت اكتر خصوصا بعد وعد تامر حسني ليا وتأكيده انه حیحترم رغبتي وبعض الطلبات اللي طلبتها منه بكل احترام وود الصيف اللي فات وأکدلي إنه حيحترم رغبتي".
وتابعت"إحنا يمكن نجحنا بمقايس الدنيا بس صدقوني بمقایس ربنا احنا لم ولن ننجح، انا عارفة ومتاكدة أن زملائي جواهم خير بس للاسف فتنة الشهرة والنجاح مش بتخلينا نشوف ونقيس الامور صح بتكلم من قلبي الكليب ده ميرضيش ربنا، أنا عيطت لاني شفت نفسي في المشاهد دي.. دي كانت زلة نتيجة ظروف مريت بيها وكلنا بنغلط ولازم نغلط علشان احنا بشر بس المصيبة اننا بنغفل وبننسی".
-إعلان توبتها
وأضافت “حلا” عبر انستجرام :"انا مش حتكسف من حد، انا تبت من المشاهد دي، وهي لا تصح، انا غلطت وبصلح، واهم حاجة ان ربنا يرضى عني لان في الاخر ده اللي حينفعنا مش الشهرة ولا النجاح لا هو مش نجاح أصلا علشان النجاح الحقيقي حاجة تانية خالص احنا اغلبنا ناسينها إلا القليلين منا الفن لو بيخلينا نبعد عن منهج ربنا ومنبقاش قدوة لولادنا يبقي باطل وميبقاش فن".
- ردود فعل الجمهور
لم تسمح الفنانة بإعطاء الجمهور فرصة لاظهار دعمه أورفضه لافعالها، فقد اغلقت خاصية التعليقات فور نشر البوست، فيما عبر الجمهور عن رأيه من خلال منشورات أخرى، فيما تباينت ردود الافعال بين مؤيد ومعارض .
وعلق حساب يدعى عصام سمير قائلًا:"نسأل الله لكي الثبات والعزيمة.. وبالنسبة لباقي الناس اتقوا الله، سيبوا الناس ف حالها.. التوبة لو ساعة بتنجي إنسان..واظن ان عندها من الشجاعه والرغبة ف التوبة اللي مش عند كتير منكم.. شوفوا هي بتسيب اايه ورا ضهرها.. وأخير الستر نعمة وفضل من الله ممكن ربنا يهتك سترك ف لحظة وتبقا اقل منها".
وردت اية اشرف على ما فعتله حلا من تباين واختلاف قائلة:"يعنى تامر جواه صراع و انتى اللى جواكى حلاوة بالقشطة يعنى ! ما انتى نفس الازدواجية تقريبا حبة كده و حبة كده شوية تمثيل بحجاب و شوية اعتزال و شوية الغاء اعتزال و شوية قلع حجاب و شوية اعتزال و حبة فووق و حبة تحت".
وفي نفس السياق، غردت إيمان المهدي:"انتي كلامك صح ومفيهوش مشكلة خالص ماعدا حاجة واحدة تامر ملهوش دعوة باللي بيتعرض ده شغل منتج عايز يروج لفيلمه خلاص انتي عملتي عمل وتوبتي ربنا يتقبل توبتك أن شاء الله بس حطي وظيفة كل واحد ف مكانها وربنا يكمل هدايتك ومتضليش طريقك تاني".
