«مش عايز أمد إيدي عليكي».. شاب يتحرش بفتاة في ميكروباص.. والركاب: «حصل خير»
«أنا عاوزة حقي وحق أي بنت اتحرش بيها».. بهذه الكلمات تحدثت نهى سليمان عن التحرش الذي تعرضت له خلال استقلالها ميكروباص.
وقالت «نهى» لـ«الدستور»: «ركبت الميكروباص وهو ركب بعدي من عند زهراء مصر القديمة على الدائري وركب في آخر كرسي وأنا كنت راكبه من قبله في الكرسى اللي قدامه».
وأضافت: «شعرت بحركة غريبة وعندما التفت وجدت يديه بين الكرسي وعندما شعر أنني رأيته سحبها على الفور وعندما واجهته وتشاجرت معه أنكر».
وتابعت: «فضل يبجح ويقولى أنا مش عايز أمد إيدى عليكي والناس اللي في الميكروباص كانو سلبيين جدا اللى يقولي معلش واللي طيب تعالي مكاني إقعدي هنا والولد اللي كان قاعد جنبه يقولي خلاص حصل الخير مفيش حد وقف جنبي غير بنت كانت راكبة معانا وست تانية كبيرة في السن وقولت للسواق ماينزلوش غير عند الكمين اللي في أول التجمع راح استغل الفرصة أن السواق وقف ينزل ناس ونزل يجرى ومقدرناش عليه أننا نمسكه واللي جنبه هو اللي ساعده إنه ينزل».
وواصلت: «كنت أنا صورته وهي البنت تانية بتشتمه وحاولنا منزلوش بس مقدرناش عليه نزلنا وراه نجري والبنت صوتت وخلت ناس في الشارع تجري وراه بس محدش لحقه وصورت الميكروباص واحنا تحت وروحت قسم التجمع قال المنطقة دي مش تبعه روحنا قسم دار السلام قال إنها مش تبعو برده وبعتونا لقسم البساتين فرغو الكاميرات وعملولى المحضر رقم ٤٧٧٨ وادونى رقمه وقالولى لو حصل جديد هيكلمونى».
وطالبت نهى سليمان أن تحصل على حقها وأن يتم القبض عليه، ومن الأكيد أنه تحرش بفتيات آخرين، وبعدها ستقوم باتخاذ كافة الإجراءات القانونية.
