سلاف فواخرجي عن أزمة نانسي: «لو مذنبين هياخدوا جزاءهم»
علقت الفنانة السورية سلاف فواخرجي على أزمة نانسي عجرم الأخيرة، حيث شاركت صورة عبر «انستجرام»، قائلة: «القانون هو الفيصل، وفي ظالم وفي مظلوم، وفي عدالة عالأرض ولو بنسب قليلة، وفي عدالة بالسماء أكبر من كل النسب، كل الناس بتطلب رأي أو موقف من الفنان، والفنان جزء من المجتمع لازم يقول ويحكي أكيد، بس لما بتكون الأمور لسا ما اكتملت صورتها».
وأضافت سلاف: «لما بتكون بإيدين القضاء، نحنا مافينا نبت أو نعطي أحكام وقرارات ولابيجوز نتدخل لأنو الحقيقة بعدها ماوضحت والقضية شائكة جدا، ولكل الناس اللي عم تطالبني بإبداء الرأي بالقضية وكأنو قراري هو الحكم، أو لمجرد إثبات موقف أو اللحاق بسبق السوشيال ميديا (والقصة مو هيك وأكبر من هيك) أنا بوقف جنب الإنسان المظلوم بغض النظر عن جنسيته، ما حدا بيقبل بالظلم لا الو ولا لغيره، وصحيح السوري انظلم من أخوته كتير، بس التعميم غلط، وبكل بلد في صالح وفي طالح».
وتابعت: «الجنسية مثل الاسم مالو علاقة فيها البني آدم بتخلق معه، والعنصريين وين ماكانوا هم ناس مريضين، وبوقف آكيد مع ابن بلدي بالحق ولو كان بآخر ماعمر الله، وكل نقطة دم منه هي من دمي، ولو نانسي ود. فادي مذنبين أكيد رح ياخدوا جزاءهم».
وأوضحت: «الموضوع أكبر مننا ومن تقييمنا وماحدا قدر يعرفه، لحد هلأ عالقليلة، والأكيد كمان انو هنن مو مجرمين بالاصل ولا ساديين، بس في شي صار غلط وغير مقبول، وأكيد هنن عيلة منيحة ماسمعنا عنهم كلام سيء بيوم من الأيام، وعندهم عيلة وبنات، والفيديوهات اللي عم تنزل والأغاني والشماتة ما بتليق بإنسان تعرض لمصيبة بكل معنى الكلمة ولا بفنان بيوم من الأيام قدم سعادة للناس».
واختتمت: «عنا ثقة بالقضاء اللبناني وعنا ثقة بالمحامين السوريين المهمين اللي استلموا القضية وبكل المحامين العرب اللي اتطوعوا لكشف الحقيقة وتضامنوا مع محمد الموسى والهم كل الاحترام والتقدير وعنا ثقة قبل كل شي بالله العادل والرحمن والرحيم، وخلوا البشر بحالهم ولايكونوا سلعة نسوقلها».
