رضوى الشربيني تلقن "أبوتورتة" درسًا على الهواء (فيديو)
شنت الإعلامية رضوى الشربيني، هجومًا حادًا على الشاب مصطفى الملقب على مواقع التواصل الاجتماعي بـ "أبوتورتة"، وفي الوقت ذاته واست خطيبته، قائلة: "جمهورية مصر والوطن العربي كله طبطب عليكي".
وقالت رضوى، خلال تقديم برنامج "هي وبس" المذاع عبر فضائية "سي بي سي سفرة": "محدش علمك زي ما دخلنا بالمعروف نخرج بالمعروف؟ محدش علمك إن بيوت الناس لها حرمة، مش تورتة؟ متعلمتش الفرق بين الراجل ورجل الطربيزة؟ دينك معلمكش إمساك بمعروف أو تسريح بإحسان؟ محدش علمك؟ واضح إن محدش علمك".
وأردفت: "كان عاوز يعملها فضيحة بجلاجل، والناس تقول ليه واحد يسيب خطيبته في قاعة الفرح ويمشي، كان عايز يوقف حالها ويسوء سمعتها ويكسر قلبها ونفسها، لكن بقى عبرة، عشان كل قوي فيه الأقوى منه، ومش هتلاقي حد يتجوزك".
ووجهت رضوى رسالة لأهل مصطفى قائلة: "مفيش واحد يقوله حرام عليك يا ابني اتقي الله؟ مفيش فيكم عاقل عنده رحمة ولا قلب يقول لابنهم ارحم البنت وسمعتها؟ أهو انقلبت عليك وهتكون عبرة لمن يعتبر، لأي شبه راجل يفكر يفضح بنت، هتكون دي نهايته".
وختمت برسالة للفتيات، قائلة: "حبي دكر واتخطبي لدكر، اتجوزي دكر، نقي لأبو بناتك دكر، مش أبو تورتة".
