ثورة أهالي الجنوب على "نسر الصعيد": "إحنا الرجولة والجدعنة"

"إهانة الصعايدة".. ذلك ما رصده تقرير لجنة الرصد والتقييم الإعلامى التابعة للمجلس الأعلى لتنظيم الإعلام، عن الحلقة الخامسة من مسلسل "نسر الصعيد" الذي يذاع على قناة "DMC"، حيث اعتبرت اللجنة أن ما قالته الممثلة مها أبوعوف عن السيدة الصعيدية والعريس الصعيدى: "دول مش زينا ولا بيلبسوا زينا ولا هيبقي فى بينا وبينهم لغة حوار.. إنت مش شايفة هما داخلين بإيه؟، دا ناقص يجروا خروفين وراهم، يا ريتهم يسمعوا ولا يتفلقوا، أنا مش عارفة إنت جايبة الهباب دا منين.. قرف قنا إيه دي اللي بنتى تعيش فيه"، يعد إهانة لإحدى فئات المجتمع.

وفي أعقاب الحديث عن الإهانة التي رصدتها لجنة الرصد والتقييم الإعلامي خلال الحلقة الخامس من مسلسل "نسر الصعيد"، انهالت التعليقات من أبناء الصعيد، حيث قال عمرو عبدالحليم أحد أبناء الصعيد: "إحنا مش هنتعب نفسنا ونرد علشان الحقيقة إحنا الصعايدة معروفين بالأصالة والرجولة"، ويقول جمال فراج: "إحنا مش هنرد بغلط زي أي حد، علشان إحنا معروفين، مش محتاجين مسلسل ولا كلام يعرف الناس إحنا مين".

وتتوالى ردود أبناء الصعيد على ما ورد في مسلسل "نسر الصعيد"، حيث قال محمود حسن أبو حمود: "الصعايدة دول أحسن ناس فى الدنيا وأرجل ناس وبالتحديد قنا، واللي يغلط فينا يبقى لسه ما يعرفناش، قنا دى أساس الصعيد، إحنا ناس على قد الطيبة كلنا هيبة"، وتقول إحدى الصعيديات: "الصعيدى ليه هيبته فى كل مكان، مهما تروح بيتكلموا عنه فى الشهامة والأصالة والكرم اللى عندنا، فإحنا ما يهمناش من أى حد يتكلم علينا لأننا من أخلاقنا ما نردش على حاجة زى كده، عشان لو ردينا حنقلل من نفسنا مع الناس دى".