حسام حسن بعد "نقطة" بوتسوانا: "خدنا ١٤ بنط وده رقم محصلش كتير"

تحدث حسام حسن المدير الفني لمنتخب مصر، بعد التعادل ضد بوتسوانا في نهاية مشوار الفراعنة بتصفيات كأس أمم إفريقيا 2025.

وقال حسام حسن في المؤتمر الصحفي ما بعد المباراة: “راضي بشكل عام عن أداء منتخب مصر في التصفيات، كنت أتمنى المكسب ولكن الأهم أننا لم نخسر في التصفيات، خدنا ١٤ نقطة وأعتقد ده رقم محصلش كتير في تاريخ مصر".

وتابع: “الأهم أننا حافظنا على عدم الهزيمة في التصفيات.. وكمان دخلنا عناصر جديدة لمنتخب مصر، نتمنى أن يكون فيه فرصة في الأچندة الدولية لإقامة مباريات ودية.. كل الأچندات مزدحمة.. نفسي ألعب ماتشات ودية قوية”.

وواصل: “بشكر اللاعبين على مجهودهم إنهم عاشوا ضغط المباريات ده دون أن يؤثر على مستواهم، منتخب مصر بيتطور، ده الأهم.. وهتشوفوا في المرحلة الجاية منتخب مصر أفضل وأفضل”.

وأكمل: “في مصر بنحاول نقلل من بعض، الأندية المصرية لما بتلعب ضد أندية الجيش الرواندي وسيمبا ونادي سيد الليبي بيقولوا عليهم مجموعة صعبه ولما يجي المنتخب يلعب يقلل من المنتخبات المنافسة في المجموعات”.

واستكمل حديثه: “ كان عندنا مشكلة في كل المراكز لو كان غاب رامي ربيعة وعبدالمنعم، ماحدش كان يقدر يقول من بدائلهم، أحمد العش عنده مشكلة في تصريح السفر، عمر فايد؟ مش بيلعب كتير ولكن أنا متابعه، إصابة بيكهام؟ الإصابة في الظهر وهيعمل أشعة رنين”.

وأتم: “كنت عايز العب في المحلة او ستاد هيئة قناة السويس ولكن ستاد المحلة مش متوافق عليه من الكاف وستاد الهيئة بيستضيف بطولة شمال أفريقيا للشباب، من حق جماهير المحافظات إنها تشوفنا”.