أول تعليق من كريم فؤاد بعد إصابته بالرباط الصليبى
علق كريم فؤاد، لاعب نادي الأهلي، لأول مرة بعد إصابته بالرباط الصليبي والتي تعرض لها في المباراة ضد سموحة في بطولة الدوري المصري الممتاز "دوري نايل".
وقال كريم عبر حسابه على “فيسبوك”: “كل خسارة دُونَ الجنة، فهي دُون، اللهم لك الحمد كما ينبغي لجلال وجهك وعظيم سلطانك، الدنيا دار ابتلاء وشقاء ودايمًا الابتلاء بيجي للشخص في الحاجة اللي هو بيحبها ونِفسه فيها وطموحه وسعادته فيها، ودا بيكون اختبار ليك هتعمل إيه في الموقف دا، وإن الاختبار والبلاء دا بيكون ليه أجر كبير ورفع درجات في الجنة وتكفير ذنوب وحاجات كتير عظيمة أوي مقابل إني أصبر على الابتلاء دا”.
وأضاف: "وأنا كان مكتوبلي إصابة في الرباط الصليبي للمرة التانية، بس عندي إحساس تاني خالص مع الاختبار دا، إنه أنا في نعمة كبيرة أوي وإن الحمدلله ربنا رزقني باختبار سهل وهين أوي مقابل ابتلاءات ناس تانية أصعب من دا بكتير، وكمان اختبار مش جديد عليا بَعيده للمرة التانية في وقت قصير في هعرف أتعامل معاه بشكل كويس ويمكن أحسن. عشان كدا بحمد ربنا إن الابتلاء اللي هاخد عليه أجر كبير وعظيم مش بالصعوبة القاسية اللي توجعني وتهدّني. أنا بحمد ربنا وراضي ومؤمن جدًا إن ربنا بيحبنا نقرب منه بالعبادات اللي منها الصبر والدعاء، الحمدلله مستعد للاختبار ومتحمس شوية وقت وهنرجع نحارب من تاني أشوفكم على خير قريب".
وقال الدكتور أحمد جاب الله، طبيب الفريق الأول لكرة القدم بالنادي، إن الأشعة والفحوصات التي خضع لها كريم فؤاد لاعب الفريق، أثبتت إصابته بقطع في الرباط الصليبي الأمامي.
وتعرض كريم فؤاد للإصابة خلال مشاركته في مباراة الفريق أمام سموحة التي جمعت الفريقين مساء الخميس الماضي، على ملعب برج العرب بالإسكندرية.
