"طعنتنى في رجولتى".. عامل يمزّق زوجته بسبب 400 جنيه فى أوسيم
“سيبي العيال وامشي”، كان يعتقد عامل أنه عندما يطلب من زوجته ترك الأطفال والذهاب بمفردها لمنزل عائلتها على إثر خلافات بينهما سينتهي التشاجر ولكنها تمادت في كلامها وسبته وطعنته في رجولته فما كان منه إلا أن مزق جسدها بطعنات نافذة في منطقة أوسيم، بمحافظة الجيزة.
قال المتهم: “اللي حصل إن أنا متجوز سمر عيد عبده من حوالي سبع سنين وربنا كرمنا بطفلين وإحنا من يوم ما اتجوزنا وهي عارفة إن أنا ظروفي المادية وحشة وفضلت تضغط عليا وكل شوية بتطلب مني طلبات أنا مش قادر عليها وأخذت قروض واستلفت فلوس لحد ما بقيت مديون بـ40 ألف جنيه وهي مش بتراعي الكلام ده وكل اللي بتقولوا إن أنا ملزمة منك والمفروض تجبلي كل الحاجات اللي انا عايزاها”.
وتابع المتهم: “أنا قولتلها أنا ظروفي وحشة ومش مقصر معاها في حاجة وبعمل اللي أقدر عليه لحد ما حصلت بيننا مشاكل وزعقنا مع بعض وكان عمها وأبوها بيجوا يصالحونا على بعض ونرجع وشوية ونعمل مشاكل تاني لحد ما جت من أول إمبارح عايزه 400 جنيه علشان مصاريف بنتي في الحضانة وأنا قولتلها معيش فلوس اصبري عليا شوية لحد ما اتصرف وأجيب الفلوس وأسدد الديون اللي عليا راحت قالتلي إن هي هتمشي وتسيب البيت وتاخد العيال معاها فشديت معاها في الكلام وقولتلها إمشي وسيبي العيال”.
ولم ينته التشاجر عند هذا الحد فقال المتهم: “راحت قالتلي إن أنا مش راجل علشان لو راجل كنت هتكفيني أنا والعيال من المصاريف بتاعتنا وأول ما قالتلي كده راحت سابتني ودخلت أوضة النوم تلم حاجتها وروحت محستش بنفسي ومستحملش الكلام ده وجيت السكينة من النيش ودخلت وراها أوضة النوم وضربتها بالسكينة في بطنها راحت وقعت على السرير وكانت بتجيب دم فأنا اتخضيت وخرجت من الأوضة وخدت العيال ونزلت على طول الشارع وكلمت النجدة قولتلهم على اللي حصل وبعدها روحت مركز أوسيم سلمت نفسي وهو ده كل اللي حصل”.
