عادى! إحنا فى مصر

كنت بـ أتكلم عن أرقام لـ فلافيو، تتعلق بـ مشاركاته مع الأهلى فى الدورى، وقلت إنه شارك فى 97 لقاء وهناك شك فى كذا ماتش تانى، فـ صديق قال لى: إزاى أرقام فلافيو مش محددة؟هو كان بـ يلعب من 100 سنة؟
طيب! دي فرصة مناسبة أتكلم عن موضوع الأرقام في مصر عموما، وسيبك من فلافيوـ دا كان بـ يلعب من 15 سنة، خلينا في واحد زي سيف الجزيري اللي بـ يلعب حاليا، كام ماتش شارك فيه الجزيري مع الزمالك الموسم اللي فات؟ اللي فات على طول دا اللي هو 2021/ 2022؟
لو فتحت موقع ترانسفير ماركت، هـ تلاقيه شارك في 26 مباراة، لو سألتني هـ أقول لك 27 مباراة، من يومين كنت بـ أراجع أرقامه عموما، استوقفتني الحكاية دي، فـ اضطريت أراجع مشاركاته ماتش ماتش، لقيتهم مش مسجلين مشاركته في ماتش سموحة الدور الأول، وكاتبين قصاد الماتش إنه ما لعبش!
أنا مسجل إنه شارك، ورغم إنى فاكر الماتش دا كويس من الذاكرة، رجعت لـ يوتيوب، لقيته عادى لعب ووشه منور فى كذا كادر، بـ حيث مفيش أى لبس فى الموضوع، فـ ليه موقع  كبير زى ترانسفير ماركت يعمل كدا؟
عادى يا عم! إحنا في مصر، وحسب بقى إنت بـ تسجل بياناتك إزاى، مفيش أي طريقة عندنا لـ التوثيق الدقيق، وكلها اجتهادات شخصية، لو قاعد بـ تتابع الماتش وجالك تليفون، حصل أثناءه تبديل، فـ إنت ما سجلتوش، واتحاد الكورة ما عندوش حاجة نرجع لها جميعا، الإسكور شيت بـ يتكتب بـ القلم الجاف وخط نكش فراخ.
ممكن عشرين حاجة تحصل تخليك تسجل البيانات غلط (أو خلينا نقول مش دقيقة) وفيه مشاكل تانية كتير مهما حرصت، مثلا سيف تيرى (اللي هو كان فى المريخ السودانى) شارك مع فاركو الموسم دا كام ماتش؟ الموسم دا اللى هو الموسم دا 2023، اللي هو لسه شغال؟
لو فتحت أى موقع مهتم بـ الإحصائيات هـ تلاقيهم 6، بينما هو شارك 7، ليه؟ علشان يوم ماتش فاركو وحرس الحدود، عربية التليفزيون ما راجتش الاستاد، عربية التليفزيون مش الـ var، باين كان فيه بلاعة مفتوحة في السكة، فـ ما عرفوش يروحوا في الميعاد، فـ محدش عرف بيانات الماتش دا، ولا مين نزل ولا مين خرج إمتى.
أنا قعدت يومين ساعتها مش عارف أسجل حاجة، بس كلمت العميد علاء السعدنى مسئول الكورة فى حرس الحدود، وهو مشكورا جاب لى البيانات. في الأول ما كانش عنده بيانات فاركو، وبعدين جابهالى. فـ فيه كذا لاعب فى الفريقين مش متسجل لهم الماتش دا فى أى حتة.
فـ عادى يا جماعة، إحنا في مصر، الدقة دى تنساها تماما تماما، كل ماتش تقريبا فيه مشكلة، أو فيه حاجة مش محسومة، أو مش متأكدين منها، هو إحنا عارفين أساسا محمد شريف سجل كام هدف فى الدورى؟ ولا أجايى؟ ولا محمد هلال؟ ولا ولا ولا، لـ إنه لاعيبة كتيييير مختلف على أهدافها: دا ذاتى ولا لـ المهاجم؟ لعب الكورة بعد ما عدت الخط ولا لأ؟ الكورة لمست مهاجم زميل وهى فى طريقها لـ المرمى ولا لأ؟
ناصر منسى مثلا فى كاس الموسم دا، سجل 4 أهداف فى ماتش إنبى ولا 3؟ مختلف عليها، بل أزيدك من الشعر بيتا: مين هداف الدوري الموسم دا؟ أحمد الشيخ؟ لا، مختلف عليها برضه، علشان الهدف اللى سجلوه فى المقاولين، البعض بـ يحسبهوله والبعض لأ، فـ ما تتخضش لما أقول لك: فيه شك، لـ إنه دايما فيه حاجة فيها شك.