مي حلمي تبرر هجومها على متابعة: «فكرتيني بأيام سودة»

هاجمت المذيعة مي حلمي، عبر مقطع فيديو إحدى متابعيها على موقع تبادل الصور والفيديوهات القصيرة "إنستجرام"، بعدما طلبت منها ملابس لنجلها، وهو طالب في الجامعة بسبب ضيق ذات اليد الذي تمر به الأسرة، قائلًة: "أنا قد مامتك نفسي في طلب ابني في الجامعى ونفسي يلبس زي أصحابه حلو، ممكن تساعديني ولو بطقم".

وبررت المذيعة مي حلمي، هجومها الشديد على المتابعة التي طلبت ملابس لنجلها قائلًة: "فكرتني بأيام مُرة، وما أقصده من حديثي عن السيدة ونجلها، إن كلنا اتمرمطنا عشان نبقى كده، أنا عندي حاجات انتي أكيد متعرفهاش، وممكن أكون قعدت سنين عمري عشان أعمل وأوصل للي انا فيه دلوقتي".

وتابعت مي حلمي: "فيه ناس في الجامعة متشحططة ومتغربة وبتدرس برضو، وشغالة في نفس الوقت، انتي ابنك أحسن من الناس المتغربة دي! انتي المفروض تساعديه يبقي راجل عشان اللي تتجوزه متبتهدلش معاه، ويبقي قاعد في البيت وتخرج هي تصرف عليه، ومتعانيش زي ما ستات كتير بتعاني، فكرتيني بأيام مرة، وسودا، ليه أنا أصرف على واحد، علميه يشتغل".

ابنك مش أحسن مني

وكانت مي حلمي قالت في فيديو سابق: "اللي أنا هقوله دا مش جحود ولكن كلنا شقيانين بشكل أو بآخر بطريقة أو بأخرى، لما حد يبعتلي يقولي أنا قد مامتك نفسي في طلب ابني في الجامعة ونفسي يلبس زي أصحابه حلو، ممكن تساعديني ولو بطقم"، أحب أرد عليها وأقولها دي رفاهية، والرفاهية دي عشان نعملها بنتعب جدًا".

وأضافت: "أنا كنت بشتغل وأنا في الجامعة ليه انتي عاوزة تشحتي لابنك عشان يلبس كويس زي صحابه، ما تخليه يشتغل ويلبس من فلوسه لأني كنت شغالة وأنا في الجامعة، مع إن أهلي مش محتاجين التعاون دا، بس ليه أنا أخلي أمي تطلب طلب زي ده، ابنك مش أحسن مني، وكان عندي كرامة وعزة نفس، مش تحامل بس انتوا نسيتوا قوانين الدنيا، يعني انتي عايزاني أصرف على رفاهية ابنك بدل ما تقوليله اشتغل".

واختتمت قولها: "محدش بيساعد حد، وناس متغربة وشغالة، محدش بيساعد حد إلا في الحالات القصوى، المرض، الحوادث، الحاجات الكبيرة، وأنا شغالة من وأنا عندي 16 سنة، إنما أصرف على ابنك عشان يلبس، انتي المفروض تساعديه عشان يبقي راجل مش تشحتيله".