اعترافات المتهم فى قضية «جمع الأزواج» بالمقطم: «كنت فاكر مراتى مطلقة»
عقب أن قضت محكمة جنح المقطم بمعاقبة سيدة وزوجها العرفي بالحبس عامًا في اتهامهما بالزنا والجمع بين الأزواج ننشر اعترافات الزوج الثاني من واقع أوراق القضية في نيابة المقطم والخليفة الجزئية.
- المتهم: «كنت فاكرها مطلقة»
قال «عبدالمنصف،أ»، 44 سنة، موظف بشركة بترول، «اللي حصل إن أنا وعبد النبي زوج مراتي الأول، أقارب وبعد كده حصلت خلافات بينه وبين مراته نفيسة ومشيت وسابته والكلام ده، حصل في شهر فبراير اللي فات، وأنا كنت ساعتها بدور عليها معاه وملقينهاش، وبعد كده أخت نفيسة أم هاشم، كلمتني في التليفون وقالتلي إن نفيسة عندها، وبعد كده في شهر مارس اللي اسمه شحات كلمني وقالي تعالى في البيت في المقطم، ولما رحتله، وراني قسيمة طلاق عبد النبي لنفيسة وقالولي ساعتها اتجوزها أنت واكتب عليها عرفي».
- الزوج الثانى: «خايفة جوزها ياخد الأولاد»
وتابع المتهم: «وكان هدفهم من ده أن عبد النبي مياخدشي العيال منها واتجوزتها وأجرتلها شقة ولقيت النجدة جاية تاخدني من عندها وودوني على القسم وعملولي محضر وجيت على النيابة».
-المتهمة: خلافات مع إخوة زوجى
قالت «نفيسة. ح»، 29 عامًا، المتهمة: «حصل خلافات بيني وبين أخوات زوجي وبعد كده سبت الأقصر في شهر فبراير اللي فات علشان ابعد عنه وجيت القاهرة اقعد عند أختي بمساكن العبد في المقطم، ولما كنت قاعدة عندها قالتلي هي وجوزها «ش. ف»، أن جوزي «عبدالنبي» طلقني وطلعولي قسيمة طلاق وورهالي وأنا ما بعرفش أقرأ ولا أكتب وبعدين قالولي مين هيخلي باله منك ومن عيالك ويصرف عليكوا، وقالولي اتجوزي «عبدالمنصف» علشان ياخد باله مني ومن عيالي وبعد كده أجر لي شقة في بلوك 187 بمساكن العبد في المقطم، وفي شهر يونيو اللي فات قابلت جوزي الأول في رمسيس وأعطاني فلوس وطلعت معاه فندق في رمسيس علشان يديني فلوس».
- معاشرة الأول أثناء الزواج الثانى
وتابعت المتهمة، «مش فاكرة اسم الفندق، وساعتها عاشرني معاشرة الأزواج وبعد كده سيبته ورجعت عند أختي وامبارح اتفاجأت زوجي الأول بيخبط على الباب بس مكنتش أعرف أن هو اللي بيخبط ومردتش افتح ولما عرفت أن هو اللي بره، كلمت أختي قالتلي صوتي ولمي الناس عليه وبعد كده لقيت الحكومة بتخبط على الباب فتحت لهم ونزلت روحت معاهم على بيت أختي وبعد كده أخدوني أنا وزوجي التاني بعد ما جاب عقدين الجواز العرفي اللي كتبناهم وخدونا على القسم».
- قبضوا عليا لوحدى
وقالت المتهمة إنها التقت زوجها الأول بناء على رغبة شقيقتها وزوجه، وكانت في ذلك الوقت متزوجة من الثاني، وكانت تقيم في الشقة المؤجرة لها من الزوج الثاني -العرفي، ووقت الضبط كانا برفقتها أطفالها «ح وع».
وأنكرت المتهمة ارتكاب جريمة الزنا، بالاشتراك مع المتهم «عبدالمنصف»، ابن عم المبلغ، وقررت النيابة حبسها وإحالتها للمحاكمة التي قضت بحبسهما عامًا.
