واحد فى الطريق العام
شخص ما في الطريق العام: ماشي/ قاعد/ راكب موتوسيكل/ عربية/ وسيلة مواصلات/ أو في حال كانت، ما كلنا بـ نتحرك في الطريق العام، وبـ يبقى لنا ألف حالة.
هذا الشخص لم يرتكب أي سيئة من أي نوع «وحتى لو ارتكب، لكن خلينا نخصص كلامنا عن اللي ما ارتكبش».
ييجي مواطن تاني يلاقي إنه منظره مضحك على نحو ما، طريف، يدعو لـ السخرية، حاجة في هدومه، قعدته، وقفته، جسمه، انعكاس ضوء ما عليه، المهم إنه فيه ضحكت أخينا التاني، أو على الأدق خياله صور له المشهد على إنه مضحك.
يقوم الشخص التاني دا يصوره دون تنبيهه، وينشرالصورة دون استئذانه على مواقع التواصل الاجتماعي، مع تعليق شايف إنه ههههههخخخخ.
الحكاية دي رصدها أحمد مكي من بدري أوي لما كان بـ يعمل شخصية إتش دبور، وكان لسه الفيسبوك جديد، والموبايل أبو كاميرا يادوب بـ ينتشر، فـ كان دبور ماسك الموبايل في وضع استعداد، لـ درجة إنه مش بـ يفكر في البشر اللي حواليه إلا بـ اعتبارهم مشاريع لـ بوستات هههههه، يضحك بيها هو وأصحابه اللي عايشين في الطيلمان.
إنما دي جريمة، في أوروبا والدول المتقدمة بـ يسموها جريمة "انتهاك خصوصية"، لكن سيبك من التسمية، هي جريمة نتيجة الأثر اللي بـ يحصل منها، دي مش حاجة بسيطة، حتى لو إنت شايفها كدا.
ولما مواطن تالت يشير الصورة، فـ دي كمان جريمة، لـ إنك بـ تشارك في الكارثة اللي حاصلة، عارف يعني إيه تلاقي صورتك عمالة تتناقل بين الناس، وهاتك يا سخرية؟
عارف لما تلاقي نفسك وسط مجتمعك: أهلك، قرايبك، زملاءك، زملاء أولادك، وإنت محل تريقة علشان جزء من جسمك عريض أو تخين أو رفيع أو أو أو ....
أو حتى لـ إنك قاعد في حتة خلت انعكاس الضوء باين في جزء من جسمك، أو لـ إنك معدي شفت أولاد بـ يلعبوا كورة فـ حبيت تجاملهم أو لـ إنك وقعت غصب عنك، أو مئات الحاجات اللي كلنا ممكن نمر بيها، لكن ربنا بـ يستر إنه مفيش مجرم بـ يصور اللقطة.
فيه ناس بـ تسوق أعذارمن نوعية إنه وشهم مش باين، فـ مش معروف هم مين.
دا عذر أقبح من ذنب سيادتك، سيبك من إنه غالبا الناس بـ تتعرف، على الأقل لـ دايرتها، لكن كمان لـ إنه دا ممكن يعرض أكتر من حد إنه يكون هو الشخص دا لو تشابهت الأجساد/ الملابس/ السمات، فـ بدال ما تضر شخص تضر تلاتة أربعة.
بـ جد، أنا مش عارف أعمل إيه علشان أقنع الناس تاخد بالها من اللي بـ تنشره، عموما يعني مش بس لقطات السخرية، إنما استسهال نشر أو شير أي حاجة على صفحتك، من غير ما تدي لـ نفسك فرصة ولو دقيقة لـ مراجعة أثر دا.
النشر على مواقع التواصل سلاح، وسلاح مهم جدا شفنا أثره في مواقف كتير بـ غض البصر هي صح ولا غلط، لكنها على المستوى الاجتماعي سلاح قوي، سكينة ماضية.
فـ تخيل حضرتك كدا إنك ماسك سكينة، وماشي تلوش بيها، ومطرح ما تندب تندب، أهو إنت لما بـ تنشر أو تشير حاجات زي دي فـ إنت بـ تعمل كدا بـ الظبط.
