واسمه عيسى مش عيسوى

فيه بوست منتشر جدا، وكل شوية يعاد تداوله، بـ يقول إيه: سبب كره الإسماعيلي لـ الأهلي إنه سنة 1958، تحديدا يوم 4 أبريل، الأهلي قابل الإسماعيلي في الدوري، وكان آخر ماتش في الموسم، والإسماعيلي محتاج يتعادل (أو يفوز) علشان يفضل في الدوري، لكن الأهلي العظيم، لـ إنه نزيه وشريف، وما يعرفش التفويت، كسب 8/صفر.

ما يهمنيش هنا مناقشة "أفكار" هذا البوست، إنما "المعلومات" غير السليمة اللي فيه:

أولا، ماتش الأهلي والإسماعيلي دا، اللي انتهى 8/صفر لـ الأهلي، ما كانش آخر ماتش في الدوري ولا حتى قبل الأخير، إنما كان في الجولة 12 من أصل 14 جولة.

الدوري كان مجموعتين، والماتش دا اتلعب بعده جولتين. الأهلي قابل المنصورة أولا ثم اتحاد السويس، بينما الإسماعيلي قابل اتحاد السويس أولا ثم المصري.

ثانيا، طبعا أي فريق محتاج أي نقاط في العموم، أيا كان موقعه وموقفه، دي منافسة بـ تعتمد فقط على النقاط. إنما بـ خصوص الماتش دا، لو اتكلمنا الإسماعيلي محتاج إيه، فـ لو الإسماعيلي تعادل مع الأهلي بل حتى لو كسب، دا ما كانش معناه بقاؤه في الدوري، والصورة كانت كـ التالي:

اللي هـ يهبط مباشرة هو صاحب المركز الأخير في المجموعة، قبل ماتش الأهلي والإسماعيلي كان المنصورة 7 بنط، الإسماعيلي واتحاد السويس 8 بنط، المصري 9 بنط، الاتحاد 11 بنط، الترسانة 12 بنط، وفاضل تلات جولات، والمجموعة كلها 8 أندية.

يعني كله في العمبوكة، وكله مهدد، ومحدش هـ يضمن البقاء لو كسب في الجولة 12 المذكورة غير الترسانة، الباقيين كلهم هـ يفضلوا تحت التهديد، حتى لو كسبوا.

وبـ المناسبة حتى بعد خسارة الإسماعيلي من الأهلي، فضل متقدم على المنصورة اللي تعادل في الجولة دي، الأمر فضل معلق لـ حد الجولة الأخيرة من المجموعة، لما الإسماعيلي خسر من المصري بـ هاتريك عبد الرازق، والمنصورة كسب الترام 2/1. 

يعني، لو الترام كسب المنصورة، كان الترام بقى وصيف المجموعة والمنصورة هو اللي هبط، أو لو الإسماعيلي كسب المصريك كان المنصورة هو اللي هبط.

ثالثا: هو إيه موقف الأهلي نفسه من ماتش الإسماعيلي؟ وهل هو محتاج النقاط ولا لأ؟ حضرتك لو الأهلي كان خسر من الإسماعيلي، دا معناه إنه صدارة المجموعة بقت مهددة، وممكن يخسر الدرع. 

الأهلي كان 17 بنط قبل الماتش، والترام كان 16، فـ لو الأهلي خسر من الإسماعيلي، والترام كسب ماتشه، كان الترام يعدي الأهلي، فـ مش عارف مين مغفل وقتها كان يظن إنه فيه أي احتمالية  الأهلي يفوت الماتش لـ الإسماعيلي، حتى لو كان عايز يجامله.

رابعا، ودا الأهم في الموضوع، حتى لو الإسماعيلي ما كانش الأخير، والمنصورة هو الأخير وهبط، فـ دا مش معناه إنه الإسماعيلي يبقى في الدوري سنتها، اللايحة كانت بـ تقول إنه الأخير يهبط مباشرة، لكن قبل الأخير واللي قبله واللي قبله، المفروض يدخلوا ملحق علشان تحديد مين يهبط ومين يفضل.

لـ ذلك، المنصورة كمان هبط، والاتحاد اللي كان سابق المنصورة هبط، بل إنه المصري، اللي كان رابع المجموعة، هبط في النهاية، ودا أنا اتكلمت عنه بـ التفصيل في فيديو، مرفقا به كل مانشيتات الجرايد وقتها، والسلام عليكم ورحمة الله وبركاته