بيزنطى العظمى

أنا مش فاهم ليه فيه إصرار على النقاش العقيم: هل الحجاب فريضة ولا لأ؟
فريضة يا سيدي، سو وات؟هل دور الدولة أو المجتمع إنهم يتمموا ع الأفراد، يشوفوهم ملتزمين بـ الفرائض "الدينية" ولا مش ملتزمين؟
يعني: هل حضرتك عايز رقابة تشوف دا صلى ولا لأ؟ دا صام ولا لأ؟ دا أدى الزكاة ولا لأ؟ دا اعترف في الكنيسة ولا لأ؟ دا كدب على مراته وقال لها إنه في الشغل وهو ع القهوة ولا لأ؟ دول جايبين في سيرة زميلهم ولا لأ؟ دا ودي ودول ودوكهمه بـ يلتزموا ولا لأ؟
لو إنت شايف إنه آه، المفروض نراقب بعض، فـ حضرتك ما ترجعش تقول لي داعش ومتطرف ولا يمثل المش عارف إيه، لـ إنه هي دي الفكرة الجوهرية لـ مثل هذه التيارات. 
ما تزعلش كمان لو جالك حد أذاك علشان مش مطلق اللحية وحافف الشارب، أو علشان لابس بنطلون وقميص أو بدلة، أو لـ إنك بـ تودع فلوسك في البنك، أو لـ إنه عندك لوحة فنية في بيتك، أو أو أو أوما هي كلها فرائض يا معلم "على الأقل بـ النسبة لـ الكثيرين من المسلمين".
طيب، هل حضرتك عايز تفسر ما يحدث لـ الناس، أو من الناس، بناء على مدى التزامهم بـ الفرائض الدينية، يعني واحد نمام "من النميمة" بـ يجيب سيرة الأهل والزملاء ولوك لوك، جه واحد قتله تقول: يستاهل! عشان هو نمام.
واحد مش بـ يصلي، عربيته اتسرقت، تقول له: علشان مش بـ تأدي الفريضة، شوف ربنا عمل فيك إيه؟
ما هي لو كدا يا أسطى، وبـ اعتبار إنه الكفر هو الذنب الأكبر، يبقى أصحاب العقائد المختلفة عن الإسلام عادي يعني لما يولعوا بـ جاز، دا مش سايب فريضة، دا بره الملة أصلا.
طيب، هـ تقول لي: أنا مش عايز أفرط في الفريضة، أقول لك: ما تفرطش، لو إنتي ست ومؤمنة بيه فريضة، البسيه، لو إنت راجل ومؤمن بيه فريضة "لا مش هـ أقول لك البسه" احرص على الزواج من سيدة متوافقة مع أفكارك، وصدقني لو سبت الناس في حالها الناس هـ تسيبك في حالك.
لو بطلت تقول في الفاضية والمليانة: الحجاب فريضة، الحجاب فريضة، وتقول دا في أي سياق، وعند وقوع أي حادث، محدش من المعسكر التاني هـ يفكر أساسا الحجاب فريضة ولا لأ؟ أصلا محدش فاضي لك.
بـ مناسبة "المعسكر الآخر"، أنا برضه مش فاهم إنتوا ليه يا جماعة بـ تطرحوا السؤال، وتدوروا له على إجابة: فريضة ولا مش فريضة؟
ما هو حضرتك إنت كدا بـ تكرس سلطته، وتختمها بـ الشمع الأحمر، لـ إنه معنى كلامك، إنه لو "ثبت" إنه فريضة، فـ دا له أي معنى بـ النسبة لـ الدولة، أو المجتمع "المصري"، ويعني قبول الانتهاكات اللي بـ تحصل بـ اسم الحجاب.
بـ المناسبة، مش بـ أتكلم بس عن انتهاكات لـ غير المحجبة، إنما الأمر جنان، لـ درجة إنه لو نجم معروف، نزل صورة بنته اللي عندها عشر سنين من غير حجاب، بـ يتفتح في وشه بكابورت، فـ هل حضرتك مش قابل البكابورت دا لـ إنه الحجاب مش فريضة؟ بس لو طلع فريضة، عادي!
ثم يا إخوانا: هل انتو اكتشفتوا الموضوع دا دلوقتي سنة 2022؟ ما إحنا بقالنا 100 سنة وأكتر في الهرتك دا، ودا قال ودا عاد ودا زاد، ودا أفتى ودا بحث، والكتب في هذا الموضوع "أو المقالات" مالهاش أول من آخر.
مفيش جماعة بشرية بـ تقعد كل الزمن دا تناقش نفس القضية، المفروض يعني أي نقاش مجتمعي بـ يحصل على قضية ما، ينتهي لما نحس إنه خد كفايته، وما عادش فيه كلام جديد يتقال، فـ كل قرد يلزم شجرته، ونشوف حاجات تانية.
فـ يا سيدي الفاضل: الحجاب فريضة، وفيه ناس مش ملتزمين بيها، ومنهم لله! ممكن تكلمنا شوية عن حكم الدين في "أبو وشين"، اللي يقول لـ الغرب كلام، وييجي هنا يسرح ألاضيشه يقولوا كلام تاني؟