أسرع هدف في الدوري

رزقي حمرون لاعب فاركو، سجل هدف سريع في ماتش ضد فيوتشر، ناس قالت 27 ثانية، ناس قالت 28، ناس قالت 30، ما علينا!
الكابتن الكواليني المعلق على اللقاء قرر بـ شكل حاسم، إنه دا تاسع أسرع هدف في تاريخ المسابقة على مر الزمان والمكان (هو قال كدا: على مر الزمان والمكان) بس شايف الدقة! 
التاسع! التاسع تحديدا، مش مثلا "من أسرع أهداف الدوري" أو حتى من أسرع عشرة أو عشرين هدف، تؤ! التاسع. ثم إنه برضه قرر إنه أسرع هدف في تاريخ الدوري تمًّا سجله الكابتن أيمن يونس في منتخب السويس.
ثم إنه المواقع نقلت عن بعض قائمة بـ أسرع الأهداف في تاريخ الدوري، وكله بـ يتكلم بـ ثقة ويقين من غير ذرة تواضع إنه يعني "فيما نعلم" أو "حسب ما رصدنا"، لأ، جواب نهائي.
المهم، أنا مش عارف الصراحة، بـ يجيبوا الجرأة دي منين في إطلاق مثل هذه الأرقام.
أصل حضرتك علشان تعمل قايمة لـ الأهداف الأسرع (في كل تاريخ الدوري) لازم يكون عندك بيانات دقيقة، أهمها تسجيلات فيديو لـ الأهداف، ويكون معاك ستوب ووتش، لـ إننا بـ نتكلم عن فروق ثواني، وممكن تبقى أجزاء من الثانية، وحتى دا مش كافي.
ليه مش كافي؟ لـ إنه بـ بساطة ممكن سرعة التسجيل تبقى مش منضبطة. اللي بـ يشتغلوا في التسجيلات الغنائية والموسيقية يعرفوا الموضوع دا كويس، وفيه ناس محترفة علشان ضبط التسجيل فـ يبقى بـ سرعته فعلا.
إنما اللي حصل إنه الكابتن أيمن يونس نفسه، قاعد في الاستوديو، فـ قرر مع نفسه إنه هو صاحب أسرع هدف (رغم إنها مش ميزة أساسا، أقصد مالهاش دلالة على مهارة اللاعب يعني، هو بس رقم قياسي وخلاص)
طيب، الشيخ طه إسماعيل هو كمان، قال لك لأ، أنا سجلت هدف أسرع، وقعدنا شوية محتارين بين أيمن يونس وطه إسماعيل، وما أعرفش مين حسمها لـ أيمن يونس، رغم إنه فيما نعلم ورأيناه إنه حسام باولو سجل هدف في الثانية 12، وهدف أيمن يونس كان في الثانية 14، بس هو برضه قرر إنهم 11 ثانية بس.
طب يا إخوانا، الفيلسوف والشيخ عندهم منبر، فـ يقدروا يدّعوا أي حاجة، لكن فيه أهداف كتيييير، أصحابها ما يقدروش يتكلموا، أو مش عايزين: اللي اتوفى، واللي ما عندوش فرصة، واللي ما عادتش تفرق معاه، وعلى سبيل المثال، محمد عباس.
عباس، موسم 1980-1981، سجل هدف في الترسانة، مجلة "الكرة المصرية" وصفته ساعتها إنه أسرغ هدف في تاريخ المسابقة، وهي مجلة دقيقة جدا، كما أنها رسمية كانت تصدر عن اتحاد الكرة نفسه، لـ الأسف ما لقيتش تسجيل لـ الهدف، لكن حسب الوصف المكتوب في المجلة، وارد جدا يحصل في خمس – ست ثواني.
طاهر الشيخ سنتر لـ مصطفى عبده، مصطفى لعبها طولية مباشرة لـ عباس، رقص قسيسة وشاطها في الجون. بـ أقول "وارد".
إنما عمري ما سمعت حد جاب سيرة هدف عباس دا، لا من قريب ولا من بعيد، دا مجرد مثال، إنما إحنا أساسا عندنا مواسم كويس أوي أوي أوي لو فيه جرنان كاتب تغطية لـ الماتش، وقال مين كسب مين، مش تقول لي الثانية 11
صلي ع النبي!