إعجاز دمنهورى

حضرتك عارف جدول الدوري؟ بـ يبقى متقسم خانات: النادي لعب كام ماتش، فاز كام، اتعادل كام، إلخ إلخ إلخ.
كل خانة من دول رقم أو رقمين، أصلك مفيش حاجة بـ المئات: مفيش نادي لعب 100 ماتش في موسم، مفيش كسب 100، مفيش حتى سجل 100 هدف، أو استقبل 100 هدف، أو كسب 100 نقطة، مفيش.
الاستثناء الوحيد في تاريخ المسابقة هو نادي دمنهور العزيز، أو حسب اسمه الرسمي "ألعاب دمنهور" اللي في موسم 2014-2015 خسر (100) نقطة. 

عارف حضرتك في الموسم الحالي، وكام موسم قبله، لو فرقة كسبت ماتش واحد وخسرت الـ 33 التانيين، خسرتهم مش اتعادلت، برضه ما تخسرش 100 نقطة، إنما سنة دمنهور دي كان الدوري 20 نادي، النسخة الوحيدة اللي اتلعبت بـ هذا العدد من غير ما يكون مجموعتين، فـ فـ كل نادي بـ يلعب 38 ماتش.
أعزاءنا الدماهرة خسروا منهم تلاتين ماتش، يعني 90 نقطة، واتعادلوا 5 ماتشات بـ 10 بنط، فـ وصل مجموع ما فقدوه لـ 100.
الأعجوبة دي من الوحيدة لـ نادي دمنهور، مثلا يعني، لو بحثت عنه في جوجل، هـ يطلع لك عشرات النتايج، بـ ما فيها صفحة النادي الرسمية، إنه تأسس 1961، على يد وجيه أباظة المحافظ المشهور لـ محافظة البحيرة، اللي تولى مسئولية المحافظة 1960، وفي السنة التالية بني مقر النادي والاستاد وووو.
حلو!
بس دمنهور بـ تلعب من قبل 1961، ومن قبل 1960 كمان، على الأقل من 1959، اللي حصل إنه أباظة عمل نهضة الإنشاءات والمباني، وسماه "ألعاب دمنهور"، فـ هم اعتبروا دا تأسيس النادي، وانمحى أي كلام قبله، وتلاقيهم عادي يقولوا لك: تأسس 1961، وصعد لـ الدوري الممتاز 1962، على أساس يعني إنه ركب صاروخ لـ الدوري.
إنما ما علينا، دمنهور الحبيبة لعبت في الممتاز زي ما قلنا 1962، أي موسم 1962-1963، ودا كان في مائدة الرحمن، ولعبت موسمين، لـ إنه ما كانش فيه هبوط في الموسم الأول غير لـ نادي واحد من أصل 24 نادي، لكنها هبطت في التاني، بعد ما اتغلبت بـ الأربعة والخمسة والستة والسبعة كمان (شحتة الإسماعيلي سجل فيهم ست أهداف في ماتش واحد، ضمن الخسارة سبعة صفر).
فييين، صعدت تاني الممتاز موسم 1978-1979، وفي كل ماتشات الموسم، ما كسبش غير مباراة واحدة، كانت على الاتحاد في إسكندرية، لكنه ما هبطش. جه الموسم اللي بعده، ربنا فتحها عليه من وسع وكسب الكبارات كلهم (بره الأهلي والزمالك) فاز ع الإسماعيلي والمصري والاتحاد والترسانة وغزل المحلة والمنصورة وإسكو، أي حقق سبع مباريات مكسب، فـ في آخر الموسم، هبط.
اللي حصل إنهم في الموسم الأول اللي نتايجه فيه كانت سيئة، ألغوا الهبوط، وزودوا عدد الأندية، فـ جم في الموسم التاني، زودوا عدد الهابطين، وهو ما تذيلش الترتيب، لكنه هبط مع الهابطين.
فضل دمنهور في المظاليم 12 سنة، ثم صعد موسم 1991-1992، وهبط على طول، ثم عاد في موسم 2014-2015 عشان يقدم لنا معجزة الـ 100 نقطة، لكنه في هذا الموسم قدم لنا معجزة تانية اسمها "حمدي فتحي".