كيروش

عايز أقول لكم سر خطير، كيروش مدير فني، بس كدا. خلصت الجملة، هو مدير فني، وحسام البدري مدير فنى، وكوبر مدير فني، وأجيرى مدير فنى، وحسن شحاتة مدير فني.

محدش فيهم عظيم وخارق، ومحدش فيهم كفتجي، محدش فيهم مخلص، ومحدش مستهتر، محدش فيهم عنده روح ومقاتل، ومحدش فيهم نايتي. كل واحد عنده مزايا، وكل واحد عنده عيوب، وكلهم محكومين بـ حاجات كتير بره إيديهم، لـ إنهم مش في الهواء الطلق، إنما بـ يشتغلوا في إطار منظومة.

المنظومة اللي بـ يشتغل فيها المدير الفني هنا اسمها "منتخب مصر لـ كرة القدم"، منتخب مصر دا، مش أعظم ولا أقوى ولا أفتك فريق بين من ينافسهم، هو منتخب عادي، في قارة مستويات معظم منتخباتها متقاربة، وكلها بـ تعلى في فترات، وتعدي عليها فترات تبقى رايحة في داهية، لكن بـ حكم حاجات كتيرمنتخب مصر مش نمرة واحد، ومش طبيعي يبقى نمرة واحد.

لكنه بـ يكسب أحيانًا!

أيون، بـ يكسب أحيانًا، زي ما منتخبات كتير بـ تكسب أحيانًا، أنجولا وصلت كاس عالم قبل كدا، توجو وصلت كاس عالم، زامبيا كسبت الكان، بوركينا فاسو وصلت سيمي فاينال أكتر من مرة، أديك شفت جامبيا مكسرة الدنيا، وجزر القمر الناس طالعة بيها السما.

النسخة اللي فاتت مدغشقر عملت شغل كبير، الجابون ساعات بـ تعمل حاجات حلوة، في القمابل غانا كانت على أعتاب ربع نهائي المونديال، وبقى لها 40 سنة ما كسبتش كاس الأمم الإفريقية.

المقصد إنه عادي يعني، وارد تكسب، ودا بـ يبقى لـ إنك أولًا اتوفقت، وثانيًا اتوفقت، وثالثًا اتوفقت، ورابعًا عرفت تدير أمورك في المنافسة دي تحديدًا. المنافسة دي قد تكون بطولة، أو ماتش حتى.

أمورك ديمش بس تكتيك وخطط ومين مركزه إيه، لـ إنه كل دا ع الورق ممكن يبقى عظيم، وفي الملعب بلح، إنما الانسجام والتركيز والإعداد الذهني والبدني، وبرضه مستوى المنافس وجديته بـ يفرقوا.

فـ أنا بـ أشجع، كسبنا، تمام وزي الفل ومبروك وفرحنا، خسرنا، دا الطبيعي والمتوقع في ظل إنك لا تمتلك قاعدة عريضة من اللاعبين اللي بـ ينافسوا في دوريات عالمية.

المدير الفني فين من دا؟

المدير الفني له شغله، وما دام هو عنده الحد الأدنى من المعرفة والتاريخ، يبقى زيه زي غيره، اختيار المدير الفني دا أو دوكهه، مش عشان هو عبقري ولا خايب، إنما إنت شايفه مناسب ليك إنت تحديدًا ولا لأ، ودي حاجة فنية دقيقة، إحنا كـ جمهور مش مؤهلين ليها، مش لـ إننا جهلة أو مش بـ نفهم في الكورة، لكن على الأقل ما عندناش كل الداتا اللي تخلينا نختار على أساسها. 

لكن بعيد عن كدا، دور المدير الفني ولا حاجة، كسب أهو راجل مرزق، خسر كتر خيره، وبـ أشوف إنه الأفضل تستقر على مدير فني واحد، لـ فترات طويلة، يعني في حدود 5-7 سنين، أيًا كانت نتايجه، لـ إنه دايمًا الوقت أحسن معلم.

مع الوقت بـ يتعرف أكترعلى مكونات المنظومة اللي بـ يديرها فنيًا، بـ يندمج فيها أكتر، وربنا يوفقه.

الكلام دا مختلف سيكا لما نتكلم عن الأندية، مش مختلف كلية، لكن سيكا، خليه لـ وقته.

القصد، عملنا بطولة جيدة، حققنا فيها أكتر مما كنا نطمح، نحافظ عليها بقى ونبني، والله من وراء القصد.