ريال مدريد ومين؟

فيه خلاف حاصل، هل ريال مدريد لما جه في نهايات 1961، ديسمبر تحديدا، قابل الزمالك، ولا قابل منتخب من لاعبي الأهلي والزمالك؟ الموضوع دا أصله بـ يجر كلام ورا كلام، وغالبا كله كلام مالوش لازمة، فـ إحنا مش مهتمين بـ الحاجات الفرعية، إنما بـ السؤال الأساسي: ريال مدريد كسب مين 7/1 في هذا الماتش؟
ما فهمته هو إنه فيه حاجة مبدئية بـ خصوص تلك الماتشات اللي خضناها، ربما تكون مش مفهومة دلوقتي، لـ إنك لو جيت النهاردا كـ أهلي أو كـ زمالك، وجبت ريال مدريد أو لاتسيو أو قابلت روما وديا، طبيعي إنك تلعب الماتش بـ لاعبيك، اللي أساسا هـ يتسابقوا على مين يشترك، مش منطقي تجيب لاعب من نادي منافس يشترك معاك في الماتش.
زمان، في الستينيات وبداية السبعينيات، كان منطقي، بل ربما نقول كمان إنه كان دا المعتاد، إنه نادي يلعب، فـ تشكيله يضم لاعبين من أندية تانية، ربما كـ نوع من تكريم اللاعب النجم اللي في الفريق التاني، ربما نوع من التعاون بين الناديين وتقوية التواصل، ربما لـ إنك هـ تشوف إنه اللاعب دا هـ يفرق معاك في الماتش، فـ تستأذن ناديه، الأسباب كتيرة، بس دا كان معتاد.
إنما اللي معتاد برضه، إنك بـ تستضيف لاعب/اتنين، ودمتم، علشان لو زاد عن كدا، يبقى مش إنت اللي بـ تلعب أصلا، هـ يبقى بس لون التي شيرت، اللي ممكن كمان تغيره لو الفريق الضيف هـ يلبس نفس اللون، فـ ما يبقاش ليك أي حاجة من الماتش.
مباراة ريال مدريد ديسمبر 1961، كانت استثناء في دا، استثناء من الناحيتين، خلينا نقول الأول إنه الماتش كان لـ الزمالك، يعني اللي على اسمه الماتش واللي بـ يعمل التواصل، واللي واللي، هو نادي الزمالك، بـ التالي من الناحية الرسمية ريال مدريد والزمالك.
بس ثواني!
رسمية إيه إذا كان الماتش ودي؟
آه صح، حاجة محيرة، هو أنا مش لاقي وصف دقيق لـ الموضوع، بس نقول إنه كان على ذمة نادي الزمالك.
اللي حصل إنه الزمالك ساعتها توسع في عملية الاستضافة، ربما لـ إنهم شافوا ساعتها، إنهم اتغلبوا الماتش الأول بتاع أبريل 4/1، فـ يعني يستحسن لو إنه الفريق جمع أفضل عناصر ممكنة، فـ طلبوا من الأهلي مشاركة عدد من اللاعبين، على رأسهم صالح سليم نفسه، والأهلي ما كانش عنده مانع، ولا اللاعبين طبعا، فـ دا إدى إحساس إنه منتخب "الأهلي والزمالك"، وفيه ناس كتير حاسباها كدا مش بس كـ إحساس، لأ، سجلوها كدا في روايتهم لـ التاريخ.
المهم، إنه أساسا مش بس الأهلي والزمالك، الفريق كمان كان فيه فتاكة من المصري، اللي هو محمد بدوي، فـ يعني كمان ممكن تقول منتخب من الأندية، زي ما كانت ماتشات الاعتزال تتعمل، ويقول لك: الأهلي  يقابل منتخب الأندية في اعتزال فلان الفلاني، وتسمية منتخب الأندية تمييزا عن منتخب مصر، لـ إنه منتخب مصر دا يشير لـ الفريق الوطني، ودا مش مجرد لاعبين، دا فيه إدارة فنية وخلافه.
على أي حال النادي الملكي فاز سبعة واحد مش أربعة بس، واللي سجل هدفـ"ـنا"، كـ مصريين يعني، هو علي محسن "اليمني".