تزوجت 17 يوما من أحمد رمزي وعمها حاول قتلها.. محطات من حياة نجوى فؤاد
يحل اليوم 6 يناير عيد ميلاد الفنانة الاستعراضية "نجوى فؤاد" التى تركت بصمة كبيرة في عالم الرقص الشرقي وكانت حياتها مليئة بالأحداث الصاخبة والشهرة والأضواء.
اسمها الحقيقي عواطف محمد عجمي ولدت عام 1943 في مدينة الإسكندرية، لأب كان يعمل كهربائي وأم ربة منزل فلسطينية، درست حتى حصلت على الشهادة الابتدائية، وهي بعمر الـ16 عاما هربت من أهلها حتى تعمل في الرقص الشرقي بسبب حبها الكبير له وأتت إلى فرقة بديعة مصابني.
محاولة قتل عمها لها:
قالت في لقاء تلفزيوني مع المخرجة إيناس الدغيدي في برنامج شيخ الحارة والجريئة إن عمها حاول قتلها بسبب امتهانها مهنة الرقص الشرقي وقالت: "عمي سيد جه في قطر الساعة 5 الصبح جالي البيت وكان جايب معاه سكينة كبيرة كنت قاعدة أنا وأمي في شقة في ميدان التوفيقية في وسط البلد، وفي اليوم ده اتسننت الساعة 12 الظهر، لأني كنت قاصر، والساعة واحدة ونص كنت بكتب كتابي على الموسيقار أحمد فؤاد حسن.
الساعة 6 الصبح لقينا الباب بيخبط، فأحمد قال مين بيخبط يا ماما كانت هي الست اللي مربيانا، قالتله معرفش فتحت الباب فلقت واحد بيقولها فين عواطف؟، قالتله ليه قالها بقولك فين عواطف، قالتله ليه بس البت لسه النهاردة متجوزة، فقالها متجوزة إيه عندكم راجل في البيت كمان، ولقيته داخل على أوضة النوم.
طلعله أحمد فؤاد حسن بالبيجامة فسأله عمي بتعمل إيه يا راجل إنت عندك، قاله أنا أحمد فؤاد حسن، قاله مين يعني، قاله اتفضل حضرتك اقرأ الورقة دي الأول، وبعدين نتكلم ففضل عمي يقرأ الورقة ويبصله فقاله عرفت تلعبها ومشي بعدها ومرضيش يشرب الشاي ولا المياه عمي كان جاي يقتلني عشان أنا رقصت، وأبويا هو اللي كان مسلطه".
زواجها من أحمد رمزي:
تزوجت الفنانة نجوى فؤاد من الفنان أحمد رمزي لمدة 17 يوما فقط، ثم وقع الطلاق لسبب غريب كشفت عنه نجوى لأول مرة في برنامج شيخ الحارة قائلة: "أحمد رمزي كان جدع مرة كان عندنا في البيت وانا متجوزة أحمد فؤاد حسن وكان بينا مشكلة حاول هو يصلح بينا بس فشل خرج أحمد فؤاد وقال إن في علاقة بيني وبين رمزي قاله طلقها وأنا هتجوزها وده اللي حصل فعلا، واتجوزنا 17 يوما بس وبعدها انفصلنا عشان اختلاف الطباع.
أكتر ما كان يميز رمزي صدقه في كل حاجة، احنا كتبنا الكتاب، في سنة 1963 وبعدين سافرت إلى نيويورك عشان اشتغل هناك، وبعد رجوعي اكتشفت أنه اتصالح مع مراته وام بناته باكينام، عشان كده انسحبت من حياته بس فضلنا أصدقاء طول حياتنا وكان بيجي يزورنى ويطمن عليا، حتى لما دخل في تجربة الإنتاج خدنى معاه في فيلم برج المدابغ.
