البدري

لو كنت مسئولا عن اتخاذ القرار وقت اختيار حسام البدري، ما كنتش هـ أختاره. أنا عندي ملحوظات كتير عليه، من أيام إدارته لـ الأهلي. كان ممكن أختار مثلا إيهاب جلال.
لكن لما اختاروه، خلاص. هم أدرى. وهم في موقع المسئولية، وممكن يكون فيه تفاصيل أنا مش عارفها، وممكن أساسا حكمي مش صائب. أنا في النهاية مشجع.
إنما الأهم يا إخواني، هو إني مقتنع تمامًا تمامًا، إنه المدير الفني هو مجرد عنصر في منظومة متكاملة، أكيد عنصر فارق، لكنه مش كل حاجة، ومش ممكن مش ممكن مش ممكن لو المنظومة مش جاهزة، أي مدير فني، مهما بلغت عبقريته، يقدر يعمل منها حاجة.
في حين إنه العكس وارد، صحيح فرصه أقل، لكن وارد. إنه منظومة متماسكة تحت قيادة مدير فني متواضع تحقق المطلوب منها على الأقل.
طبعًا طبعًا لو منظومة جاهزة متماسكة، يقودها مدير فني قوي يبقى حاجة عظمة، لـ إنه هو كمان جزء من المنظومة، فـ بـ يزيدها تماسكًا وجاهزية.
مش هـ أطول عليك، لما اختاروا البدري، خلصت بـ النسبة لي. 
طيب، خضنا عددًا من اللقاءات في مواجهات مختلفة، الأداء غير مرضي، النتايج ماشي الحال، مش أعظم حاجة، بس يعني المطلوب بـ يتحقق، لكن الأداء فعلا سيئ جدًا.
كويس، هل المسئول عن داهو حسام البدري؟
متقدرش تقول إنه مش مسئول خالص، هو المدير الفني، بـ التالي لو ليك ملحوظة "فنية" قولها، لكن هنا فيه شوية نقاط:
أولا، تحميله المسئولية بـ الكامل وترشيحه لـ دور "خزاعة" (من قتل رجالكم؟ خزاعة. من يتم أطفالكم؟ خزاعة. من لعب في أفكاركم؟ خزاعة) أمر بـ النسبة لي غير منطقي.
فيه أمور كتير جدا في المنتخب مش مظبوطة، وفيه سوء تخطيط، وفيه تخبط، وفيه حاجات كتيرة، بـ ما فيها الجمهور نفسه.
ثم إنه يا إخوانا، والله والله، العادي بتاع منتخبنا إنه مش فريق كبير بس كل دي موضوعات تانية، كل واحد منها يستحق حديث منفرد.
ثانيًا، امتداد الكلام من إنه حسام البدري مقدمش أداء مقنع، لـ القول بـ إنه ما بـ يفهمش، وملوش فيها أصلا، ووصفه بـ المدافع المجهول، ومدرب الصدفة، وكل الحاجات الحلوة دي، بـ يصيبني بـ خنقة، تفوق خنقة مختار صالح، وهو عايش وسط فرقة حسب الله.
البدري مدير فني بـ معنى مدير فني، أكيد مش يورجن كلوب، وأكيد عنده مشاكل، بس هو مدير فني، له سيرة ومسيرة، ومحقق نتايج وأرقام، وفيه ماتشات عمري ما أنساها، زي ماتش الزمالك 2010 بتاع الكاس، وماتش الزمالك 2017، وماتش النجم الساحلي 6/2، وماتش الترجي 2012.
لأ، مدير فني، عايز نتكلم في مشاكله أكلمك لـ الصبح، بس بعد الموضوع ما يقدم شوية.
ثالثا، الكلام عن مرتبه لا يليق بتاتا، اللي عنده شك في فساد ما، يطرح الموضوع بس يبقى فيه ولو شبهة أدلة، أو حتى قرائن.
إنما لـ إنك مستكتر راتبه، أو لـ إن راتبك إنت شخصيا زي حالاتي كدا من ماركة كوكو الضعيف، فـ دي حاجة صفيقة.
راتب أي حد، بـ يبقى طبقا لـ السوق، وموقعه هو في المجال، وحسب ما عمله وحققه. حسام البدري في 2010 ومكانش لسه عمل أي حاجة، غير بطولة دوري يتيمة، وخبرته موسم وربع راح المريخ السوداني بـ20 ألف دولار شهريا، غير مكافآت وحوافز إضافية، فـ أنا مش شايف خالص إنه الرقم مبالغ فيه، طالما المسئول اختاره يبقى من حقه.
رابعًا، تمام! المسئول أقال حسام البدري، نديهم بقى فرصة يختاروا المدير الفني الجديد، لأ! إزاي؟ أنا عايز حسام حسن، أنا عايز إيهاب جلال، أنا عايز ميمي عبدالرازق. ولما اختاروا حد تاني، يبقى مش عاجبني، من قبل ما أشوف وأحكم.
المشكلة مش إنه اللي بـ يطرح بـ يقدم دا بـ اعتباره رأيه الشخصي، بناء على فهمه ومتابعته، لأ يا إما تختاروا حسام حسن، يا إما تبقوا فاسدين وعاملين مافيا ورباطية.
يا إما إيهاب جلال، يا إما تبقوا سيريال كيلرز.
يا إما رضا عبدالعال، يا إما نعيمة نعمين.
إيه دا؟ بـ جد، إيه دا؟ ربنا يشفي