اليوبيل القطني

السبتية، زي ما إحنا عارفين، هي منطقة في قلب القاهرة، معروفة لـ إنها مركز مهم لـ تجارة الخردة.
إنما في الخمسينيات والستينيات، كانت مشهورة أكتر من كدا بـ كتير، واسمها يتردد آناء الليل وأطراف النهارعلى كل الألسنة، في كل مكان بـ مصر، بـ سبب "فار السبتية"، اللي هو تقريبا أسطورة.
الموضوع كان له علاقة بـ النور لما يقطع، الكهربا يعني، وهي وقتها كانت بـ تقطع كتير، وانتشر تفسير لـ هذا الانقطاع المتكرر، بـ إنه "الفار"(الحيوان القارض دا) القاطن في منطقة السبتية، بـ ياكل الغطا البلاستيكي لـ أسلاك الكهربا، فـ يعمل قفلة، فـ النور يتقطع في إسكندرية مثلا.
ليه السبتية تحديدا؟ عشان دا المكان اللي اتبنت فيه أول محطة كهربا في القاهرة المحروسة سنة 1892، بـ التالي دا المركز. وهو اتبنى هناك لـ إنه فيها نشأت منطقة صناعية صغيرة، لـ قربها من ميناء بولاق (الذي كان).
إنما في الواقع، لا الفار ولا المنطقة الصناعية ولا المينا هم اللي خلوني أكتب الكلام دا.
أنا بس كنت عايز أقول لك، إن المنطقة اتسمت السبتية (في أحد الأقوال) لـ انتشار محلات اليهود هناك، ودول كانوا بـ يقفلوا يوم السبت، فـ بقت السبتية، فـ المهم هنا، هو حكاية السبت دي.
سيبك من كلام كتير بـ يتقال عن السبت، وتقديس اليهود ليه، لـ إنه مليان تفاصيل، خلينا نشاور على حاجة واحدة، هي النظام السبتي، اللي هـ ينشأ عنه نظرية اقتصادية، أصحابها بـ يسموها "الاقتصاد السبتي"، وفيه مؤمنين كتير بإنه تطبيق هذا النظام، هـ يحقق العدالة الاجتماعية الغائبة.
ملامح الاقتصاد السبتيجاية من الكتاب المقدس، خصوصا سفر اللاوييين، وهو نظام لـ تقسيم الأيام والشهور والسنين، وما ينبغي على الإنسان فعله، في كل دورة زمنية معينة.
اكتمال النظام السبتي بـ يبقى في بداية السنة الخمسين، من كل دورة، إشمعنى الخمسين؟ لـ إنه زي ما فيه أسبوع أيام، فيه أسبوع سنوات، يعني كل 7 أيام أسبوع، وبرضه كل سبع سنوات أسبوع.
لما يمر سبعة من الأسابيع السنوية، يبقى عملنا كام سنة؟ بـ الظبط، 49 سنة، وهنا تبدأ السنة الخمسين، فـ يجب النفخ في البوق، وتبدأ عملية إعادة لـ توزيع الثروات، فـ يجب إسقاط الديون عن المديونين، وإعادة الممتلكات لـ أصحابها، وتحرير العبيد، وغيرها من المظاهر الاقتصادية.
إنما يا أصدقائي، النظام السبتي، والاقتصاد السبتي، قصة طويلة، ربما متكونش مهمة بـ النسبة لي، ولا بـ النسبة لك، لـ ذلك، مش هي اللي عايز أتكلم عنه، أنا بس كنت عايز أقول لك، إنه السنة الخمسين دي، زي ما قلنا بـ ينفخ فيها بـ البوق.
البوق دا اسمه إيه؟
اسمه "اليوبيل"
ولـ ذلك مرور خمسين سنة، على حدث ما، بـ يسموه اليوبيل الذهبي، من حكاية اليوبيل الذهبي دي بقى فيه احتفالات، كل دورة زمنية معينة، لـ أي حدث، كلنا نعرف منها اليوبيل الفضي لما يمر 25 سنة، اليوبيل الذهبي لما يمر 50 سنة.
إنما في الواقع، فيه أنواع كتيرة لـ اليوبيل، حسب عدد السنوات، ودا بـ جد.
فيه يوبيل خشبي، لما يمر 5 سنين، يوبيل برونزي، لما يمر عشر سنين، بل إنه كمان فيه يوبيل قطني، ودا لما يمر على الحدث سنة واحدة، فـ اللي عايز أقوله لـ حضرتك:
إنه من كام يوم كان اليوبيل القطني، لـ تحويل متحف أيا صوفيا إلى مسجد، هلللويا