الكأس السلطانية

طيب، دلوقتي إحنا في العقد التاني من القرن العشرين، الاحتلال البريطاني مش حابب الاتحاد المختلط بتاع بولاناكي، ولا راضي عن بطولته، ومش مبسوط من الهوية الفرنسية له، ولا بـ اتصاله مع المجتمع الدولي، خصوصًا إنه حتى في أوروبا، إنجلترا بـ تعتبر نفسها حاجة، والباقيين على بعض حاجة تانية.
كمان الأندية المصرية مش عاجبها الاتحاد المختلط دا، ولا بـ تشارك في بطولته، ويبدو والله أعلم، ودا استنتاج شخصي مني، إنه كمان الاتحاد دا نفسه، لم يكن يسعى لـ استقطاب الأندية دي، ولا عايز منها حاجة، مع ملاحظة إنه العقد التاني من القرن العشرين، اتأسست خلاله أندية كتير من القاهرة وإسكندرية وغيرهم.
تلاقت رغبة الإنجليز مع الأندية المصري، فـ كان الطبيعي إنه جهود تحصل لـ  تأسيس اتحاد بديل عن اتحاد بولاناكي، وينظم بطولة في عموم القطر المصري، وفعلا في 11 سبتمبر 1916، اتعمل أول اجتماع في مقر جريدة الإيجيبشيان ميل بين الإنجليز والمصريين لـ النظر في هذا الأمر.
حضر الاجتماع دا ممثلون عن فرق القوات البريطانية، مع خمسين مندوب لـ الأندية المصرية، مش خمسين نادي، خمسين مندوب، لكن عدد الأندية مش مؤكد، إنما نعرف إنهم كانوا أندية من 3 محافظات: القاهرة والإسكندرية وطنطا.
إلى جانب الحاضرين كان فيه جوابات من ناس ما قدرتش تيجي، لكنها مؤيدة لـ قرارات الاجتماع، الأندية اللي ما جاتش دي من بني سويف والزقازيق وبلبيس والمنصورة والسويس.
أسفر الاجتماع عن موافقة الحاضرين على تأسيس "الاتحاد المصري الإنجليزي"، اللي هـ ينظم أول بطولة يشارك فيها أندية مصرية، هي مش أول بطولة عشان قبلها بطولة الاتحاد المختلط، ومش أول بطولة مصرية، عشان قبلها كاس حشمت، ثم إنك ما تقدرش تقول عليها مصرية خالصة، إنما الدقيق كدا: "أول بطولة يشارك فيها أندية مصرية"
قبل ما نتكلم عن البطولة، خلينا بس نقول حاجة، إنه مش معنى كدا، إنه "كل" الأندية المصرية كانت مشاركة في تأسيس الاتحاد دا، ولا عضوة فيه، كان فيه أندية رافضة، وعايزة لو هـ نأسس اتحاد وننظم بطولة، يبقى حاجة مصرية خالصة، إنما اتحاد مشترك مع الإنجليز، يبقى عملنا إيه، ما كنا انضمينا لـ الاتحاد المختلط.
الأندية اللي رفضت في البداية دي كان متزعمها النادي الأهلي.
البطولة اللي نظمها الاتحاد المصري الإنجليزي، كانت بـ تتلعب بـ نظام الكؤوس، والفايز بيها يحصل على كاس، الكاس دي قدمها السلطان حسين كامل، تشجيعا لـ الاتحاد ولـ البطولة، فـ اتعرفت في التاريخ بـ اسم "الكاس السلطانية".
كمان عملوا لجنة، زي لجنة المسابقات كدا، لـ تنظيم شئون الكاس والأندية المشاركة فيها، كان رئيسها هو المستر ميدويل، وسكرتير اللجنة إبراهيم أفندي علام، وعضوية كل من كابتن لويس، السرجنت ريجلند، مصطفى أفندي حسن، نقولا أفندي العرقجي.
زي ما حضرتك شايف مصري إنجليزي أهو.
أول نادي فاز بـ الكاس السلطانية دي هو فريق قوات الإشارة البريطانية، والإنجليز فضلوا يكسبوا الكاس دي أول 4 نسخ ورا بعض.
سنة 1918، الأهلي غير رأيه، وشاف إنه لو فيه نشاط ومستمر، وبـ تشارك فيه أندية مصرية، يبقى الانعزال غير مفيد، خصوصا إنه مفيش اتحاد مصري، ولسه مفيش في الأفق حاجة تشير إلى إمكانية عمل هذا الاتحاد، إنما الكاس السلطانية دي، لسه فيه كلام عنها شوية، فـ خليها لـ مقال جي.