عميد لاعبي العالم

في يوم من الأيام، صحينا من النوم، قالوا لناإنه الفيفا هـ تكرم حسام حسن، وتمنحه لقب "عميد لاعبي العالم". إيه يا با الحاج عميد لاعبي العالم دي؟قال لك: دا يا وله أكثر لاعبي العالم تمثيلا لـ منتخب بلاده.
ربك والحق، أنا اتوغوشت من الحكاية دي، أصلك "عميد لاعبي العالم"دا لقب، أو على الأدق جايزة، لكن الجايزة لما تكون من الجهة الرسمية، يبقى ليها قوة اللقب.
بينما "الأكثر" دي، أي "أكثر" عموما، هو رقم قياسي، وما ينفعش خالص خالص يابا الحاج، تدي لقب بناء على رقم قياسي، دا إلحاد كروي والعياذ بـ الله.
ليه؟
لـ إنه حضرتك اللقب لازم يكون مقفول، بينما الرقم مفتوح.
يعني، لقب "بطل الدوري المصري العام لـ موسم 2019 – 2020"، حصل عليه النادي الأهلي، بناء على إيه؟
أولا، تفوقه على منافسين معينين، جرت المنافسة بينهم، في نفس الظروف وبـ نفس القواعد، ما ينفعش نقولإنه الأهلي بطل الدوري، ومانشستر سيتي الوصيف، الأهلي لم ينافس مانشستر سيتي، مانشستر سيتي وصيف الدوري الإنجليزي.
ثانيا، الأهلي تفوق لـ إنه النادي صاحب العدد الأكبر من النقاط، ولوايح المسابقة بـ تقول، اللي ياخد نقاط أكتر يكسب اللقب.
ثالثا، هذه النقاط ليست عشوائية، إنما بـ تمنح بـ نظام، الفوز له تلات نقاط والتعادل نقطة والخسارة لا شيء، في مواسم أخرىكان الفوز بـ نقطتين، ولو كان ساعتها بـ تلاتة كان البطل اتغير.
رابعا، الفوز والتعادل والخسارة، مش في أي لقاء، مش هـ أحسب هنا، إنه الزمالك كسب وادي دجلة وديا 51، ولا إنه الأهلي غلب سموحة في ماتش تحضيري، لا، إحنا عندنا 34 مواجهة معينين، بين الأندية المتنافسة وبعضها، في نظام معين.
خامسا: المسابقة لها بداية محددة ونهاية محددة، بـ مجرد انتهائها خلصنا، سيظل إلى أبد الآبدين، الأهلي بطل الدوري المصري لـ موسم 2019 – 2020، زي ما الزمالك كان بطل في موسم 2014 – 2015، والإسماعيلي موسم كذا، والترسانة موسم كذا، وهكذا.
هي دي "الألقاب" كما أفهمها، مغلقة، بينما الرقم القياسي مفتوح تماما، حضرتك بـ تقول لي، الأكثر تمثيلا لـ منتخب بلاده في العالم، هات النقاط السابقة، وحاول تطبق أي حاجة منها.
هل هو بين متنافسين معينين؟لا، حضرتك بـ تقول لي "في العالم"، سيبك من دي، وهـ نتغاضى كمان عن قصة "قميص منتخب بلاده"، مش هـ نسأل:ليه ما يكونش عميد لاعبي العالم، الأكثر مشاركة وخلاص. سواء بـ قميص منتخب بلاده، بـ قميص ناديه، بـ قميص أخوه الصغير.
إنما خلينا في المهم، حضرتك هـ تحسب "الأكثر" دي، بناء على إيه؟ممكن واحد يقول، المدة الزمنية: يعني اللاعب الفلانيمثل منتخب بلاده 22 سنة متواصلة، مفيش سنة دون مشاركة، هو دا الأكثر تمثيلا لـ منتخب بلاده.
لكن واحد تاني يقول، لأ، إحنا نحسبها بـ البطولات، يعني مثل بلاده في كام بطولة؟تلاتة كاس عالم، 5 كاس الأمم، 7 كاس العذاب، يبقى مثل بلاده في 15 بطولة، يبقى هو الأكثر تمثيلا لـ منتخب بلاده.
ييجي واحد تالت يقول لك، لأ بـ عدد المباريات، رابع يقول: عدد الدقايق، خامس يقول: عدد المباريات اللي بدأ فيها أساسي، سادس يقول: عدد المباريات اللي كان في قايمة الفريق، حتى لو كان احتياطي ما نزلش الملعب، وسابع وتامن وتاسع.
طيب،خلينا ننسى كل دا ونسأل:دلوقتي حضرتك اخترت أي معيار، وطبقته بـ أثر رجعي، وعملت كل الموبقات، ومنحت اللقب لـ "س" من اللاعبين، هل دي نهاية لـ التنافس على الرقم؟
يعني، لما ييجي اللاعب "ص" يكسر هذا الرقم، هـ تعمل إيه؟هـ تمنح اللقب لـ "ص"؟طيب "س" يبقى إيه محله من الإعراب؟هـ تسحب منه اللقب؟ولا هـ تضيف له "السابق"؟ولو هـ تضيف له السابق، مش واجب برضه، تجيب كل "السوابق" وتمنحهم اللقب بـ أثر رجعي؟
فـ الحكاية يا إخواني، مش ظابطة من كل النواحي، ما ينفعش حد يحصل على لقب، بناء على رقم، ما ينفعش.
طب هنا فيه تلات أسئلة:الأول، هل دا معناه، إن الأرقام القياسيةمالهاش اعتبار؟التاني، هل الناس في الفيفا، مش مدركين الكلام دا؟
التالت: نسيته، لما أفتكره، هـ أبقى أجاوب لك ع التلاتة مع بعض