سباعية في حلقات

هم سبع بطولات في سنة واحدة؟ ولا سبع بطولات في موسم واحد؟أصل السنة غير الموسم، دا طبعابعد ما نتفق يعني إيه بطولة.
يعني، لما نقول إنه برشلونة، كسب ست بطولات في موسم واحد، 2008/ 2009، فـ إحنا قدام بطولات كلها رسمية، كلها في نفس الموسم، اللي له بداية محددة ونهاية محددة.
البطولات هي: الدوري الأسباني، كأس أسبانيا، السوبر الأسباني، دوري أبطال أوروبا، السوبر الأوروبي، كأس العالم لـ الأندية.
مفيهاش بطولة شرفية، ولا ودية، ولا السوبر الأسباني البرتغالي، لأ، كلها بطولات معترف بيها من الفيفا، بـ تتلعب بـ انتظام، وليها بطل كل موسم.
كمان، كلها في إطار "موسم" كروي واحد، بدأ في بدايات خريف 2008، انتهى في بدايات صيف 2009.
طيب، هل حصد أي نادي آخر في العالم، على سداسية زي دي، الإجابة كلا البتة، أومال إيه، دا أنا رؤوف خليف مأكد لي، إنه الزمالك واخد سبع ألقاب في موسم واحد، أو في سنة واحدة.
طيب، تعالى نراجع كدا: كأس مصر موسم 2002، حلو، كأس مصر موسم 2001/ 2002، ولا موسم 2002/ 2003؟ولا سنة 2002؟أي إجابة هـ تقولها، أنا معاك فيها، ونعد على أساسها.
لو تقصد 2001/ 2002، أنا معاك، وهـ نبقى ملزمين بـ موسم 2001/ 2002، اللي بدأ خريف 2001، وانتهى صيف 2002، إيه البطولات اللي كسبها الزمالكفي الفترة دي؟
كاس مصر، وإيه كمان؟والسوبر المصري، وإيه كمان؟بس. علشان الدوري كسبه الإسماعيلي، وأفريقيا كسبها الأهلي، والسوبر الأفريقي كسبه الأهلي، وما كانش فيه بطولات تانية.
لو قصدك 2002/ 2003، فـ كاس مصر سنتها كسبه الأهلي من الإسماعيلي، الزمالك لم يجمع الدوري والكاس، من سنة 1988 لـ سنة 2015، مفيش ولا موسم في النص، الزمالك كسب دوري وكاس في نفس الموسم.
لو قصدك سنة 2002، مش موسميبقى نبدأ مع 1 يناير 2002، ننتهي في 31 ديسمبر 2002، هنا بقى نقول، الزمالك كسب كاس مصر 2002، بطولة دوري أبطال أفريقيا 2002، السوبر المصري 2002.
بس كدا، السوبر الأفريقي كان 2003، السوبر المصري السعودي القليوبي 2003، بطولة أول فيصل بن فهد 2003.
أصلك إنت عايز تحسبأي حاجة حصلت في 2002، حتى لو في أوله، بـ اعتبارها في موسم 2002/ 2003، وأي حاجة حصلت في 2003، حتى لو في آخره، بـ اعتبارها برضه في نفس الموسم، ودا مش ظابط.
طيب، نحسب بطولات الزمالك، في موسم 2002/ 2003، هـ نلاقي
السوبر المصري، الدوري المصري، دوري أبطال أفريقيا، السوبر الأفريقي. بس.
أومال السوبر المصري السعودي (اللي هي مباراة شرفية ما اتكررتش)، والبطولة العربية (اللي هي أساسا بطولة ودية، تحت رعاية فيصل بن فهد)
دول يا باشا، كانوا تبع موسم 2003/ 2004، واتلعبوا بـ قوايم 2003/ 2004، هم عشان اتلعبوا في سنة 2003، عايز تحسبهم في موسم 2002/ 2003.
هو طبعا، أي حد عايز يحسب أي حاجة، يحسبها، يعني أنا مثلا ممكن أقول، إنه الأهلي هو نادي القرن في أفريقيا وأوروبا، لـ إننا غلبنا ريال مدريد، في مباراة القرن 2001، أو إننا غلبنا روما 4/3، وكسبنا الكاس المصرية الإيطالية، وجمعنا دوري وكاس وسوبر أفريقي 2005/ 2006، وأي كلام في عبد السلام.
لو دا يريحك، إشطة، سبع بطولات في موسم واحد، أقول لك، سبع بطولات في شهر، أو سباعية في حلقات، اتبسط