بالفيديو.. أسامة كمال لـ"المسئولين": "لو مش قد شرف المنصب.. اعتزلوا"

قال الإعلامي أسامة كمال، إن المسئولية الرسمية، تشريف، بجانب كونها تكليفًا، مطالبا المسئولين باعتزال العمل العام؛ إذا لم يحافظوا على "شرف المنصب".

وأضاف كمال -خلال تقديم برنامجه "القاهرة 360" المذاع على فضائية "القاهرة والناس"-: "هناك كلمة بنسمعها كتير من المسؤلين بتقول المنصب تكليف مش تشريف، وكأن المناصب تكليف بالمهمة وليس تشريف لصاحبها".

وتابع: "اختلف مع الفكرة، لأن التكليف في حد ذاته تشريف من المسؤول الأكبر، لو كان تعيينا أو تشريفا من الناس.. لو كان انتخابا، حتى كلمة مسئول أوقات كتير ما بفهمش معناها؛ لأن عكسها غير مسئول ومتهيألي كلنا مسؤولين".

واستطرد، قائلا: "يعني حضرتك لو وزير ومش قادر تظبط أداء وزارتك، اتفضل استريح في بيتك أو شغلك التاني الذي ضحيت به".

وأوضح: "لو سعادتك محافظ والدنيا بايظة لو سمعتنا سلام عليكم؛ يمكن نلاقي واحد يعدل الأمور فيها أو يخلينا نقول ولا يوم من أيامك يا سيادة المحافظ، أو يا جناب رئيس الحي".

وأضاف: "المسؤلية تشريف وشرف، ولو مش قادر تحافظ على شرف المنصب صغير أو كبير من الشرف أنك تقول وتعتزل ونشوفك تاني لما الدنيا تنصلح ونبقى عايزين فنان يحط لمساته النهائية".