عاجل| «علشان تاخد لحسة من الترند».. المطربة إيناس عز الدين ترد على ممثلة تحمل نفس اسمها
ردت المطربة إيناس عز الدين على تصريحات الممثلة إيناس عز الدين التي اتهمتها خلالها بمحاولة استغلال اسمها وصورتها لتحقيق الشهرة والترند على حسابها.
المطربة إيناس عز الدين ترد على ممثلة تحمل نفس اسمها
وقالت المطربة إيناس عز الدين، في أول تعليق لها على صفحتها بـ"فيسبوك": «يا ستي هو إنتي حد جه جنبك ولا داسلك على طرف.. أنا كتبت على صفحتي عن اللي حصل معايا بسبب الزعل والحزن وصدمة اتعرضتلها كانت هتفقدني حياتي وبطمن أهلي وإخواتي وأصحابي وحبايبي كتر ألف خيرهم، والصحافة كتبت وطمنوا الناس عني كتر ألف خيرهم مشكورين رغم إني لا طلبت يكتبوا ولا عمري ببعت أخبار ليا لأي صحفي رغم إن كلهم إخواتي وأصحابي وحبايبي وبنسأل على بعض طول الوقت ويقعدوا يقولولي يا بنتي ابعتيلنا أي أخبار تخصك عن أي جديد ليكي ومش ببعت ولا عندي مسئول إعلامي ولا بعرف حد علشان مصلحة إنه يكتب عني إلا لما حد بيكلمني وبيسألني أو يطلب يعمل معايا حوار عمري ما بزعله وبتشرف جدًا كمان، فلما يتكتب خبر في مليون موقع وتتحط صورتك بالخطأ على خبر أو اثنين منهم زي ما دايمًا بيحصل وبيحصل معايا برضوا وبكبر دماغي لأني لما اتكلمت قبل كده اتقاللي إن المحررين أحيانًا بيغلطوا ويتلخبطوا وده بيحصل مع فنانين كتير جدًا، وسبحان الله مش بشوف حد فيهم بيتكلم بالأسلوب ده».
وأضافت: «ترند إيه ومين اللي استغلوا صورك علشان يحققوا الترند يا فندم، ومين اللي عايز يركب ترند على حسك وبصورك.. صورتك على الخبر في موقع أو اتنين من بين ألف خبر، يعني علشان نفهم الكلام موجه لمين ونعرف نرد».
واختتمت: «طب كنتي قولي سلامات بدل الكلمتين دول، ده والله فيه ناس ما بتطلع ترند إلا لما بتدخل على أي خط فيه اسمي وصورتي ويحطوه في جملة مفيدة، والله هم يبكي وهم يضحك وهم يا جمل».
