حياة الروح
سحر الموسيقى
سحر بيهمس وبيحكى وساعات يصرخ
سحر بيملك الودن ويمسكها من إيدها ويجرى على مصدرها، يا ترى جاية من السما ولا من شباك الجيران ولا من الشارع
يجوز من جواك، من اللى اتبقى جوه روحك من هدهدة الجدات والأمهات، أو غنا الفواعلية على البنايات، أو نداء البياعين والبياعات
الأغانى اللى بتتولد وتكبر فى الأزقة والحوارى والشوارع وتزهر فى الميادين، الأغانى اللى بترفض تتعبى فى شريط
أو تتحبس فى أسطوانة، الأغانى اللى بترفض تتوظف فى الهيئات والمؤسسات ويبقى مطلوب منها توقع بالحضور والانصراف
الأغانى اللى بترفض تتمرغ على سجاد القصور، واللى مابتسجنش روحها جوه بدلة وفستان، واللى ليها قدرة السحر فى تبديد المخاوف والطاقات السلبية، وتستبدلها بطاقات تجدد العزم وتستلهم الدروس والعبر من التاريخ والرموز البناءة، الأغانى اللى بتعيد إنتاج أنواع اندثرت واختفت تحت دعوى الحداثة والتماهى مع العولمة وفخها الرهيب، الأغانى اللى بتتحرر من التنظير والوعظ وبترفض تطبطب على الناس بشكل مجانى، الأغانى اللى بتعيد طرح السؤال وبتحاول تلاقى إجابة جديدة بعيد عن وهم الذوق العام والسلة الجاهزة اللى بيسوقها المنتج «الجمهور عايز كدا» اللى بيبدع الغنوة مش مقص دار بيفصلها على مقاس اللى بيسمع، وأنا باتمنى أسمع عن جيل رفض الشهرة والمجد المزيف، رفض يحلق فى الفضا ويوعد بالقمر وبالنجوم.
وقرر تبقى غنوته ماشية وسط الناس بتحك فى أكتافهم وتتخلط بروايحهم، الموسيقى مكان للأرواح الجميلة، أسواره شفافة وحيطانه من ورد وشموع وورق سلوفان.
مدينة بتعيش فيها مجموعة من الناس فى سلام وأمان من غير متاريس ولا مراقبة ولا تفتيش عن هوية.
الليل فى حياة الروح ونس وصحبة وسلطنة، جملة بتبدأ على لسان بنت أو ولد من السهرانين، جملة باحلم إنها قدرت تحرر بعض الأماكن المهملة زى الجراجات القديمة أو مقالب الزبالة بعد تنضيفها وتلوينها وتزيينها، جملة تفرض وجودها فى بعض الأماكن زى القهاوى أو البدرونات، وتقدر مع الوقت تجتذب بعض الناس وبعض الداعمين، وتستمر هيمنتها لحد ما تيجى موجة جديدة أعلى فتهز ثوابت وتطور مفاهيم، وتبقى عبارة عن قوة ناعمة عظيمة تتفنن فى استحداث حيل فنية، زى النكتة والاستعراض والجرافيتى والمشهد والجداريات اتكسى أماكن بالشجر والورد والفراشات والبهجة والدهشة والألوان، موسيقى وأغانى تنقش الأمل على الأرواح وتحث الجموع على النهضة والوعى والبناء.
