مسافة حضن

جربت تحضن شجرة
تختبر كينونة تانية
تبقى واحد من عيلتها 
تسيب حواسك
حرة في مشيئة الرياح
ترقص معاها 
بخفة في صخب الفراغ 
تبقي غصن وتلمس الحسن 
اللي سايل من زهورها 
بكل رقة صابحة
تستنى الندى
تبقى قش ف عش 
عصفور استخبى من الشتا
تبقى تحت بؤونة ضلة
نعسوا فيها البنايين 
والا ثمرة قوتت عابر سبيل
تبقى دفتر ذكريات عشاق وشاهد ع الغرام 
تبقى شجرة جدرها في الأرض مادد 
بس طايرة في السما 
طايرة فوق الدنيا والناس والأماكن 
شجرة زاهية بكبريائها
ثابتة ولا يحنيها حزن 
كل ده بيحصل وانا باحضن حبيبتي
وف مسافة بس حضن