فى انتظار «جعفر العمدة»
من فترة طويلة لم يتابع الناس مسلسلات بمثل هذه الدرجة، كما يفعلون مع «جعفر العمدة»، ولم يندمجوا معه بهذه الطريقة حتى إن المشاهدين جميعًا تشعر وكأنهم عايزين جعفر يرجع من لبنان بعد ما ربنا يفك كربته علشان ياخد لهم حقهم من عيلة فتح الله.
ما زال «أحمد فهيم» أحد أهم اكتشافات دراما رمضان، مشهد فرح زوجته من منذر رياحنة ودموعه التى انهالت بعد أن سأله «إنت اتجوزت مراتى؟» عظيم، ومشاجرته معه ثم استسلامه له وهو يتعرض لضرب مبرح وعدم دفاعه عن نفسه كان مؤثرًا للغاية.
سيبقى مشهد زواج «وداد» من شوقى فتح الله، عقب خروجه من السجن مباشرة، فى ذاكرة الكثير من الرجال، وداد التى هربت من بيت زوجها «سيد العمدة» وبعد يومين تظهر عروسة فى الفرح، حيث كشف المسلسل عن الحيلة التى تلجأ إليها بعض النساء بعد أن تقوم برفع قضية خلع وهى تعيش مع زوجها وتكتب عنوانًا مضللًا، المشهد المؤثر لا ينبغى أن يمر هكذا، وأعتقد أن أمامنا حل من اتنين، إما تشريعى ليضبط هذه النقطة، أو اللى يتعرض للموقف ده يستأذن محمد رمضان يروح معاه يخلص له الليلة.
الممثلة جورى بكر التى قامت بدور وداد تلقت هجومًا من نوع خاص على السوشيال ميديا.. الهجوم كان من نوعية «حسبى الله ونعم الوكيل فى اللى عملتيه فى سيد العمدة، ومنك لله حد يتجوز وهو متجوز، وارجعى لسيد عيب كده»، جورى كتبت على صفحتها إن ده تمثيل وإنها متجوزة وبلاش شتايم فما كان من البعض إلا أن هاجمها مجددًا وقال «وكمان متجوزة هو الشرع دلوقتى محلل للست تتجوز أربعة».. أهلًا بكم فى كوكب القرود.. السوشيال ميديا سابقًا.
الناس وهى بتتفرج على مسلسلات رمضان نصها عنده استعداد يروح يقعد مع ولاد منى زكى لحد ما أمهم ترجع م البحر، والنص التانى عايز يروح يوجب مع سيد العمدة ونعيم ويتخانقوا مع عيلة فتح الله لحد ما ربنا يرجع جعفر بالسلامة.
لحظة انتقام جعفر العمدة من شوقى فتح الله وأخوه كارم هتكون أهم من هدف محمد صلاح اللى صعدنا كأس العالم.
عيلة العمدة اتبهدلت فى غياب جعفر من شوقى فتح الله وشقيقه.. لما يخرج جعفر من ضيقته مش هيحل حد والدم هيوصل لركب المسلسلات التانية.
عصام السقا عامل دور عمره لدرجة إن الواحد بيدعى إن ربنا يكرمه بصديق زى نعيم.
أقل واجب بعد اللى عمله شوقى فى عيلة العمدة إن حلقة الانتقام تبقى ساعتين ع الأقل ومن غير إعلانات.
