المتهم بقتل محامي كرداسة: «غدر بيا وسلمني لأعدائي وخرجهم براءة»
كشفت تحقيقات نيابة حوادث شمال الجيزة الكلية، التفاصيل الكاملة لمقتل محامي كرداسة بعدما سرد المتهم خلال التحقيقات دوافعه لارتكاب الجريمة.
وقال المتهم "م. ف" الشهير بـ "م. خ" المتهم بقتل "ب. ح" المعروف إعلاميا بمحامي كرداسة، إن المجني عليه كان سببا في تدمير حياته وخسارة كل قضاياه التي وكله فيها، علاوة على بيعه لخصومه وزوجته وأسرتها واتفاقه معهم ضده "غدر بيا".
وقال المتهم، "هو اللي حصل إن أنا كنت شاري قطعة أرض من ناس وبعد ما اشتريتها دخلت كردون مباني وكانوا عايزين يرجعوا في البيعة وأنا مرضتش فراحوا ضربيني بالعصي وعوروني بالمطاوي وأنا روحت عملت محضر بالواقعة دي".
- خدوا براءة على حسابي
وأضاف المتهم روحت وكلت الأستاذ "ب" والناس دي خدت براءة وبعدها بفترة أنا كنت رايح الشغل لقيت نفس الناس دي مستنيني على الطريق وراحوا ضربوني بالنار وروحت المستشفى وعملت محضر باللي حصل وكان الأستاذ "ب" هو المحامي بتاعي والناس دي بردو خدت براءة، فأنا روحت له عشان اسأله الناس دي خدت براءة إزاي قالي إن هما عملوا إعادة إجراءات في القضية.
- شهد ضدي
وتابع المتهم المحامي راح شهد ضدي في المحكمة وعشان كده خدوا براءة وقبل الواقعتين دول أنا كنت خاطب واحدة اسمها وكانت قريبة المحامي من بعيد ـ وسيبتها وبعد ما الواقعتين دول حصلوا لقيتها جيالي البيت وقالت لي إن هي غضبانة من جوزها ومش عايزة ترجعله وعايزة تتجوزني وأنا قولتلها الكلام ده مش هينفع وخدتها وودتها بيت خالها، ووقتها خالها وقرايبها قعدوا يضربونى وعوروني وأنا اتنقلت المستشفى والنيابة جت سألتني وأنا في المستشفى وبعد كده قلت للمحامي يتابع القضية.
- جواز تحت الضغط
واستطرد المتهم أمام جهات التحقيق قائلا، وبعد فترة لقيتهم بيضغطوا عليا والأستاذ "ب" عشان أتجوز البنت دي فأنا اتجوزتها وخلفت منها بنتي مريم وبعد فترة عرفت إن أهلها خدوا براءة في القضية اللي كانوا ضربوني فيها، فأنا قلت خلاص مفيش مشكلة وأنا كده كده اتجوزتها وكبرت دماغي وبعد فترة من جوازنا وبعد ما خلفت مريم عرفت إن مراتي بتشم بودرة هي وأمها وسلوكها وحش.
فأنا طلقتها وكان معايا بنتي وبعد كده أهل طليقتي جم ولعوا في بيتي وأبويا عمل محضر بالكلام ده، وبعد فترة من الموضوع ده لقيت طليقتي خدت حكم إن هي تاخد البنت معاها فأنا بعت أبويا للمحامي، وكلمته في التليفون وقلتله وطلبت منه إن هو يعملي قضية عشان اخد البنت تاني قاليى خلي أبوك وأمك يعملولي توكيل وأبويا وأمي عملوله التوكيلات".
