دورة إعداد مقدمى المشورة الأسرية
تشرفت بمشاركتى الأسبوع اللى فات فى دورة إعداد مقدمى المشورة الأسرية المعتمدة دوليًا لتدريب ٣٠٠ متدرب ومتدربة من أعضاء وميسرين ورائدي أعمال المجلس القومى للمرأة من جميع محافظات وقرى الجمهورية ضمن البرنامج القومى لتنمية الأسرة المصرية، استمرارًا لمسيرة العطاء والوصول لكافة فئات المجتمع المصري.
فى خلال ٨ أيام ركزت الدورة على تقديم مهارات المشورة الأسرية وتدريب المدربين من خلال:
كيفية اختيار شريك الحياة، بتوعية الشباب المقبلين على الزواج بكل ما يتعلق بالعلاقة بين الطرفين وإزاى يعرفوا نفسهم واحتياجاتهم زى ما محتاجين يعرفوا الطرف الآخر وآليات التعامل مع شريك الحياة والتخطيط المشترك بالأمور المتعلقة بحياتهم المستقبلية وأساليب الحوار لحل مشاكلهم.
تانى حاجة التدريب على نشر الوعى لأهمية تنظيم الأسرة والتوعية بمبادئ البرنامج القومى المصرى لتنظيم الأسرة والحقوق الإنجابية وفقًا لمنظمة الصحة العالمية بهدف المحافظة على صحة الأم والأطفال والحفاظ على الحالة الاقتصادية والنفسية للأسرة.
وبعد كده ييجي محور التثقيف الصحى للحمل والولادة، وإزاى ندعم الأم بكل البدائل والاختيارات المتاحة للولادة وتثقيف الزوج لاحتياجات الزوجة فى المرحلة دى من دعم صحى ونفسي.
ودور مقدم المشورة هى المناقشة مع الأم فى رغباتها واحتياجاتها ومشاركة مخاوفها والرد على أسئلتها وتقديم المعلومات الكافية ليها ودعم اختياراتها من خلال الوسيلة المناسبة الآمنة ليها.
من أهداف الدورة بردو التوعية بأهمية الرضاعة الطبيعية المطلقة لأول ٦ شهور فى حياة الطفل، وأهمية وضع المولود ملاصقًا الجلد للجلد لأول ساعة بعد الولادة وياخد أول رضعة طبيعية من الأم.
ومد الأم بكل المعلومات عن الرضاعة الطبيعية والأوضاع السليمة المريحة للطفل والأم وكل الحلول المتاحة حتى تبعد قدر المستطاع عن اللبن الصناعي.
محور النمو والتطور للطفل وهو جانب أساسى وخطر فى نفس الوقت، فمن خلاله بنحكم بيه على حاجات كتير عند البلوغ ومواجهة الحياة. فضرورى الاهتمام بيه من مراحل مبكرة من خلال الوالدين وميسرين ومشرفي الحضانات والمراكز التربوية.
فبيتم التدريب على أهم المهارات المكتسبة لكل مرحلة وأهم النصايح اللى بتساعد على نمو الطفل بشكل صحي ويتم إدراك المشاكل أو الإعاقات فى مرحلة مبكرة وهنا بييجي دور مقدم المشورة، فهو بيلاحظ لو كان الطفل مش بيتطور بشكل جيد وفى احتمالية أنه يكون متأخر فى النمو، فمقدم المشورة بيتحمل مسئولية مناقشة مخاوفهم مع الأسرة.
فالطفل بيتطور بسرعة، فلو فى أى حاجة مأثرة على نموه، فالأفضل عدم اتباع منهج الانتظار والترقب وحصوله على مساعدة مهنية مبكرة ممكن يفرق بشكل كبير على حياتهم بعد كده.
ومناقشة القلق بخصوص نمو الطفل مع الوالدين مش حاجة سهلة أبدًا، لكن مهم جدًا تدريب مقدمى المشورة لضمان التدخل المبكر اللى بيحتاجه الطفل.
ومن ضمن المحاور هى دليل التغذية السليمة للطفل، من أجل جسم سليم وعقل سليم وتحسين مناعة الجسم ومقاومة الأمراض.
طبعًا كمان اتكلمنا عن المشاكل اللى بتواجه المجتمع المصرى من عادات خاطئة زى الختان والزواج المبكر وزواج الأقارب.
كل ده وأكتر بالتفصيل بشكل علمى وعملي.
فحقيقى مجهود أكتر من رائع بالتعاون مع نخبة كبيرة من الدكاترة الاستشاريين بقيادة دكتورة عبلة الألفى رئيس مجلس إدارة الجمعية المصرية لأعضاء الكلية الملكية البريطانية لطب الأطفال بالتعاون مع الدكتورة مايا مرسى رئيسة المجلس القومى للمرأة.
