بشرى تنعى أسماء مصطفى: دموعى لم تتوقف من الحزن عليكِ

حرصت الفنانة بشرى على نعى الإعلامية أسماء مصطفى، وكتبت عبر حسابها الشخصي بموقع تبادل الصور والفيديوهات القصيرة انستجرام: مأثرة فينا أوي يا أسماء، ماذا بينك وبين الله علشان قلبنا يوجعنا عليكي كدا، فراقك وجع بجد ورغم تكرار أخبار الموت مؤخرًا، وإحساس الواحد أنه خلاص اتعود على الفراق وقاعد مستني دوره، بس دموعي مش عايزة تقف عليكي من امبارح، والتأثر مش بطول وقت المعرفة.

تُوفيت أمس الإعلامية أسماء مصطفى، وذلك بعد صراع مع مرض السرطان، وكانت تعاني منذ فترة من مضاعفات بعد إجرائها عملية جراحة لاستئصال الورم.

وتابعت بشرى: “سبحان الله الأثر اللي الإنسان بيسيبوا في اللي حواليه قيمته وقوته وتأثيره بيفاجئ الإنسان نفسه، الله يرحمك ويحسن إليك، مواقفك معايا كلها إيجابية وجدعة، حتى قبل ما يكون فيه بيني وبينك سابق معرفة، كنتي بتدعيلي في عز مرضك، وافتكرتي عيد ميلادي وبعتيلي وأنتي متألمة”.

وأضافت: “كان عندي أمل ربنا يختارك بمعجزاته، لكن اللهم لا اعتراض، الطيبون بيمشوا بسرعة، مع السلامة يا أسماء”.

آخر كلمات الإعلامية أسماء مصطفى

روت أسماء مصطفى عبر حسابها على "فيسبوك" معاناتها بعد إصابتها بالسرطان وكتبت: "أمي ربنا يديها العمر والصحة ويصبرها على ابتلائها فيا قبل ما أتجوز، لأنى كنت برفض ناس كتير، كل ما كانت تسألني كنت أقولها عايزة أتجوز راجل بيحبنى بجد لنفسى، كانت تدعى وتقولى ربنا يرزقك بالى يقدرك ويريح قلبك يكون ابن أصول عمرها ما تمنت ليا عريس يجبيلى مثلا شبكة بكام ولا هسكن ولا حاجة خالص زى ما بيحصل ولا طلبت غير راحة بالى وحد يقدرنى".

وأضافت أسماء: "وربنا سبحانه وتعالى استجاب دعوتنا إحنا الاثنين رزقنى براجل بجد بيحبنى لنفسى ولشخصى وبيقدرنى والمحنة والمرض خلونى أفتكر دعوتها، المرض الملعون ده دمرنى، لكن هو شايفنى أحلى ست فى الدنيا ولاقيته ضهرى وسندى فى دنيتى، ربنا يحميه ويحفظه ويكفيه شر الحاسدين ويبارك فى أولادنا ويحفظهم ونقدر نعدى المحنة ونخرج بمنحة يا رب صبرنا على ابتلائنا".