رواد السوشيال ميديا يتفاعلون مع مخرجة فيلم «مش أنا»: معز وحلا غلطانين

تصاعدت أزمة الفنانة حلا شيحة حتى أصبحت تتصدر مواقع التواصل الاجتماعي ومحركات البحث، حيث شن عدد كبير من نجوم الفن هجومًا عليها بعد تبرُّئها من فيلم "مش أنا" وهجومها على النجم تامر حسني عقب إعلانها عن ندمها على الفيلم قائلة: "الفيلم مش أنا فعلًا".

وازداد الأمر تعقيدا في الساعات الأخيرة عقب رد زوج "حلا"، المنتج والداعية معز مسعود، الذي كتب عبر حسابه بموقع إنستجرام: "إلى زوجتي الغالية حلا.. قادر أفهم انزعاجك نتيجة مرور وقت كبير على تصوير الفيلم ده بسبب كورونا، وإن حياتك اتغيرت زي ما انتِ قولتي في البوست بكل احترام، وقادر كمان أفهم انزعاجك من التركيز على المشاهد دي وتجميعها رغم الوعد الشفهي بتجنب ذلك من صناع العمل (الكلام ما كانش عن إلغاء الكليب ولكن إن التركيز ميكونش على مشاهد معينة زي دلوقتي)، خصوصًا مع نزول الكليب في توقيت له قدسية كبيرة بالنسبة لنا".

-رد ناري من مخرجة الفيلم
 

لترد سارة وفيق، مخرجة الفيلم، قائلة: "أستاذ معز أنا سارة وفيق مخرجة فيلم مش أنا.. قرأت بوست حضرتك اللي بتوضح فيه إنك فاهم قصد حلا عن بعض اللقطات اللي كان المفروض نراعيها.. خلينا نتكلم بالحق بعد إذن حضرتك، إحنا نشيل مشاهد ليه وبأي حق بعد ما صورت وأخدت أجرها كامل؟".
 واستطردت: "واحنا مالنا انك اتجوزتها!! انت اتجوزتها فنانة وبتصور الفيلم دا ودي حاجة بينك وبينها احنا مالنا، وكمان بتقول كنت هتاخد إجراء.. إجراء ايه اللي تاخده انت ملكش اي حق تاخد أي إجراء المفروض تشكرنا اننا مخدناش إجراء قانوني ضد مراتك اللي امتنعت عن تسجيل صوتها لدوبلاچ الفيلم وعن تصوير افيش الفيلم اللي مدفوع فيه ملايين، انت متعملش حاجه غير انك تشكرنا لأننا شيلنا كل المشاهد اللي هي ماكنتش عايزاها، وممكن ابعتهالك تشوفها عشان تعرف بس ازاي انا و المنتج والفنان تامرحسني فتحنا الفيلم وعدنا المونتاچ تاني على حساب الفنان تامرحسني مادياً عشان يرضي حلا، مع إنها مشاهد من وجهة نظري طبيعية وكوميدية ورومانسية راقية لأن دي طبيعة أفلام تامر ومع ذلك شال كل المشاهد دي واحترم وجهة نظرها".

وأكملت موضحة: "فيما يخص الكليب بقى هو حضرتك كنت فين من 21 يوم من ساعة ما الفيلم نزل ما هو الكليب في الفيلم ومصر كلها تقريبًا شافت الفيلم ومحقق أعلى إيرادات، كنت فين حضرتك وهي كانت فين؟ ما هو الفيلم كله على بعضه هينزل كمان في التلفزيونات بالكليب اللي جواه، وبعدين دا كليب رومانسي والمراعاة من وجهة نظرك هي ضرر من وجهة نظر الإنتاج، ودي مصاريف كبيرة أوي وحلا وافقت تصور برضاها، ورغم كل دا كلمناها كتير مردتش علينا ولا على رسايلنا، كان لازم بخبرتك تخليها تتواصل مع شغلها وتقفل الصفحة صح مش تخليها تقاطع شغلها وتورطها كدا دا لو انت السبب في المقاطعه دي والله اعلم".

وعلق عدد من رواد مواقع التواصل الاجتماعي على رد المخرجة، حيث قال أحمد محمد: "برافو عليكي قولتي كل حاجة ولخصيتها وحلا فعلا غلطانة"، فيما قال محمد ابراهيم: "معز سبب المشاكل والمخرجة عندها حق"، وقالت شيماء عبدالله: "كل شوية حلا تعمل مشاكل بس المرة دي تامر حسني دفع التمن من جيبه في المونتاج.. ميصحش كدا يا حلا".