خلطة كازابلانكا

كازابلانكا مليان حاجات كتير ممكن تتفرج عليها وتنبسط.
 طبعًا أكشن كتير، بـ كل أنواعه تقريبًا، عربيات بـ تطير فى البحر، عربيات بـ تقتحم بيوت، عربيات بـ تقع من فوق الجبل، عربيات بـ تطارد عربيات، المهم فيه عربيات كتير باظت، وعربيات نفدت، هـ تستمتع أوى لو إنت بـ تحب العربيات، وفيه كمان هدية مجانية عدد واحد موتوسيكل عفريت، بـ يظهر فى بعض المشاهد.
إنما دا مش كل حاجة، فيه خناقات راجل لـ راجل، والعركة اللى لو ابتدت الناس هـ تزعل، الناس اللى فى الفيلم طبعًا، لكن المتفرجين مش هـ يزعلوا خالص، وعركات فى الشارع، وعركات فى خمارة، وعركات فى الصحرا، وعركات بـ أسلحة، وعركات بـ دون، وستات بـ تضرب، وحرايق، وحاجات آخر أبهة.
الأكشن فى الفيلم متصور بـ إتقان كبير، وتقنيات عالية، وصرف واضح لـ أى ذى عينين، وقدرات كبيرة على الإقناع بـ إن اللى بـ يحصل دا بـ يحصل جد، مستوى هوليوودى آخر تلات حاجات، وصورة لطيفة، وكادرات متاخدة بـ عناية، بعضها متاخد من طيارات لزوم المشاهد اللى بـ نشوفها من فوق، لو كنا عايزين نورى لقطة لـ مكان زى سوق أو جبل.
مش بس أكشن، عندنا كمان تمثيل كتير مبهر، وممثلين من نجوم الصف الأول، كلهم فى أفضل حالاتهم، يعنى لو إنت بـ تحب أمير كرارة، كرارة بتاع زمان ما قبل سليم الأنصارى، بتاع طرف تالت وحوارى بوخارست، هـ تلاقيه بـ ريآكشاناته اللى وحشتنا، كـ شاب صايع بُرم. إنما لو إنت مش بـ ياكل معاك النجم أبو دور واحد دا، هـ تلاقى إياد نصار متفوقًا على نفسه فى دور جديد تمامًا عليه، سواء من حيث اللوك، أو البادى لانجويش، لـ إنه اخترع لـ الشخصية لازمات بـ إيديه ومشيته وطريقة تمايل جسمه، مناسبة أوى لـ شخصية الهجام الواطى اللى المفروض إنه بـ يلعبها، وهـ تلاقيه زود حتة الكوتشينة اللى بـ يمسكها فى الخناقات دى برضه حركة صايعة، ما أعرفش إذا كانت من السيناريست الجميل هشام هلال، ولا دى من منشآت إياد نفسه، بس حلوة.
نوازن بقى بين كرارة وإياد بـ ممثل خفيف الظل يدينا جرعة ضحك بقى، الضحك بتاع الأكشن دا مش بتاع الكوميديا، اللى هو إنت مش بـ تضحك طول الفيلم، إنما لما بـ يظهر عمرو عبدالجليل إنت ضامن إن المشهد هـ يكون مبهج، ولما يكون معاك كاتب زى هشام هلال فـ إنت ضامن إنه مفيش إيفيهات حمضانة، وتقليدية، بـ العكس، حاجات كلها طازة وذكية وجديدة، رغم إنها معتمدة على طريقة عمرو عبدالجليل وتكنيكه المعتاد فى التمثيل، بس شغالة، وشغالة جدًا.
بنت حلوة بقى مع أم ظريفة، تبقى غادة عادل ولبلبة، والبنت كمان ليها فى الأكشن، وطبعًا تتخطف والبطل يحررها، وفوق كل دا ضيوف شرف ليهم حضور كبير ولافت، نيللى كريم فى مشهد أكشن، بيومى فؤاد فى مشهد صريخ ضحك، أحمد فهمى فى مشهد يعمل بلوت تويست يقلب الحدوتة كلها، ويمهد لـ جزء تانى فى حالة نجاح الفيلم.
كل شىء مبهر بـ صراحة.