عاجل.. محمد سلام يرفض المشاركة فى موسم الرياض: "مش هقدر أطلع أغنى وأرقص وأخواتنا فى غزة بيموتوا" (فيديو)

أعلن الفنان الكوميدي محمد سلام، عدم مشاركته في المسرحية التي كان سوف يشارك فيها خلال موسم الرياض، الذي من المقرر أن ينطلق يوم 28 أكتوبر المقبل.

ونشر "سلام"، عبر حسابه الرسمي على موقع التواصل الاجتماعي "إنستجرام"، مقطع فيديو كشف فيه تفاصيل عدم مشاركته في موسم الرياض.

وقال محمد سلام، خلال الفيديو: "المفروض أني كنت أسافر بكرة للسعودية عشان استعد للمشاركة في مسرحية (زواج اصطناعي) واللي من المفروض أنها تتعرض في موسم الرياض وبالتحديد يوم 30 أكتوبر، والمسرحية كوميدية استعراضية يعني فيها ضحك ورقص وأغاني والمفروض أننا نعرض في وسط الأحداث اللي شغالة في غزة وأخواتنا شغالين يموتوا وبيتقتلوا".

وأضاف: "ليه بقول الكلام ده في آخر لحظة والمفروض أسافر بكرة، لأن كان عندي أمل أن موسم الرياض يتأجل زي ما حصل في مصر سواء في مهرجان الجونة السينمائي أو مهرجان القاهرة السينمائي، بس حتى الآن مفيش حاجة بتحصل والناس بتموت في غزة".

وتابع: "طب أنا دلوقتي إزاي هروح أعرض والناس بتموت هناك.. أنا حاسس أني لو عملت كده هكون زي اللي بيقتلهم بالظبط، يعني مش كفاية السكوت اللي إحنا فيه وشايفيننهم بيموتوا لكن كمان أروح أغني وأرقص واللي بيحصل بيحصل في فلسطين".

واستكمل: "عشان كده أنا بعتذر عن المشاركة في فعاليات الرياض لأن قضية فلسطين دي قضية كل المسلمين والمفروض واجب علينا مساعدة أخواتنا في غزة، لكني زي ناس كتير مش عارفين نعمل حاجة".

وأضاف الفنان محمد سلام: "طب دلوقتي لما  نموت وربنا يسألنا ساعدنا أخواتنا في فلسطين إزاي..  اللي معملش حاجة هيسكت لكن أنا أقول إيه.. أقول أني كنت بقدم مسرحية كوميدية وبغني وبرقص وأخواتنا في غزة بيموتوا ويتدبحوا نساء وأطفال".

واختتم: "كان عندي أمل موسم الرياض يتلغي أو يتأجل لكن ده محصلش ومعرفش ليه.. طيب لو أنا مسافرتش هموت من الجوع، طبعا لاء لكن أخواتنا هناك اللي بيموتوا.. عارف أن الفن رسالة لكن مش هقدر أعمل كده".