يا وحدك

اسمي لوحده دنيا..

اسمي لوحده حياة.. 

أنا رحلة الأيام والسنين والساعات..

أنا مسجد وكنيسة ومعبد وأشجار..

جذرى فى الأرض من أيام الأجداد..

أنا الأم، أنا الأخت، أنا الطفلة..

تعبت من وصف وصفة وصفات..

أنا التاريخ والجغرافيا والتضحيات والشهداء..

أنا الحب..

أنا الحرب..

أنا عايزة أعيش فى سلام..

وهقول إيه.. كلام أفلام..

إحنا السلام والأبطال اللي متكتبوش فى الأفلام..

طولت عليكم فى وصف الغلاف..

أنا عمرى.. أنا روحى.. أنا نفسى..

أخفف عنك الآلام..

سمعت قلبك يبكى..

شوفت قلبك بيصرخ..

والصمت فى كل مكان..

شوفت الدمار والأحزان..

شوفت الموت فى كل مكان..

وانتى وحدك شايلة الطوب..

وانتى وحدك شايلة الحجارة..

وانتى وحدك شايلة الأحزان ومكملة..

وبتصرخى والعالم يسمع ويشوف..

صوت وصورة وحكايات..

وملفات وكتب وأبحاث..

ومعظمهم.. جبناء..

بشوف رسالة منك.. لكل اللي خذولكى وخانوكى..

مكتوب عليها.. الدوام لله..

وانتى وحدك.. سكتى الولاد..

وانتى وحدك.. أكلى الولاد..

وانتى وحدك.. علمى الولاد..

وانتى وحدك.. اشفى الولاد..

سامحينى لو مقدرتش..

أرفع عنك الظلم والآلام..

سامحينى.. يا وحدك..

سامحينى.. لو مقدرتش أرفع الظلم عنك..

سامحينى.. لو مقدرتش أحميكى من الكلاب والتجار..

سامحينى.. لو كشفوا سترك..

وأكلوا فى لحمك.. والكل سكات..

سامحينى.. يا وحدك..

ملقتش غير القلم.. يحكى عن وجعى ووجعك..

وميسكتش لحد الممات..

سامحينى.. يا وحدك..

لو اتفقوا عليكى، ووحدوا الأهداف..

والقطاعات والورث.. طين وحيطان..

وسلامى للجدار..

سامحينى.. لو مقدرتش أسكت قلبك..

سامحينى.. على عجزى وضعفى..

سامحينى.. يا وحدك..

بس هكتب.. وأحكى الحكاية فى كل مكان..

يمكن ولادك.. فى يوم يكون على أيديهم الخلاص..

سامحينى على ولدك وولدك وأولادك.. اللي سابونا وراحوا هناك..

خلى الناس نيام.. والإنسانية كلام..

العالم ساكت.. لا العالم رافع الشعارات..

ندد وهدد وأشجب وأشاد وأعرب..

وقال كلمته.. الكل على الكل..

والكل فى الكل.. مبيهمناش..

سامحينى.. يا وحدك..

مكسوفة من نفسى..

وزعلانة من كل إنسان..

شاف الظلم.. وسكت عشان لسه جبان..

أنا شوفت العيال فوق الأنقاض..

كانوا عاملين عيد ميلاد..

هيحكوا فى يوم من الأيام..

ويقولوا اللي مقدرش عليه الجبناء..

سرقوا كل حاجة إلا الإيمان..

بقولك إيه الفلوس مبتربيش ولاد..

بس الألم صنع الرجال..

نقطة ومن أول الصبر..

سلامى لحقوق الإنسان والقانون الدولى فى كل مكان..

سلامى ليكم.. وعليكم السلام..

سامحينى.. يا وحدك..