فطيرة بالسكر..

قصة بنت حكايتها حكاية.. هى وحيدة.. رغم إن لها 4 إخوات رجالة.. 

حظها كده.. أول بنت فى العيلة..

عنيدة ومختلفة.. بطلة مختلفة..

بينادوا عليها يا بت.. كان نفسها يقولوا اسمها.. 

مش شايفنها.. ومش عارفينها.. ومحدش واخد باله منها..

كل يوم أبوها يقول فين الولاد.. فلان وفلان وفلان، وآخر واحدة يسأل عليها: فين البت..

البت تعبت.. البت عملت الواجب.. البت خلصت..

أنا البنت.. اللى نفسى تندهولى باسمى.. أنا مش أقل من إخواتى الولاد.. 

مش ذنبى إنى اتولدت بنت.. إنت ليه مش شايفنى يا بابا..

تعرف.. إنت أول واحد حبيته.. واستنيته.. بالفطيرة بالسكر..

كنت بحس إنك فاكرنى.. كنت بستناك ورا الباب..

مخليه سريرك مسطرة.. والكنب بتاعنا مسطرة..

أعملك العشا.. وأغطيه.. وأستناك، وأحط المياه والكوبايات..

أنا البنت اللى كبرتوها قبل أوانها.. أنا البنت مش الست..

أنا كنت حبيبتك.. إنت نسيتنى من زمان..

أنا ليا اسم.. إنت اللى اخترته..

طيب أنا هوريك البنت..

تخلينى أقرا الجرايد والمقالات.. كنت بتختبرنى..

ولما أغلط.. تقولى عيدى تانى من الأول.. 

هو إنت إزاى مش شايفنى.. أنا أكتر واحدة حبيتك فى الدنيا..

سمعت إنك زعلان إنك جبت بنت.. وقالولى إنك مش بتحب البنات..

آه..  لو كنت تعرف.. كنت بتوجعنى قد إيه..

كنت مستنيه تقول البنت أجدع من الولاد..

جوه نفسى.. مش عارفة..

بتحبوا الولاد.. ومبتحبوش البنات..

الواد سند.. بس أنا بنت غير كل البنات..

زعلت يوم ما اتولدت.. بس بكره هتشوف البت..

عيدى يا بت.. متقوليش يا بنت..

أنا مش جبانة..

لمضة وعندية من يومك..

بقولك: متقوليش يا بنت الكلب..

أنا أبويا.. أحلى واحد فى الدنيا..

وأجدع راجل فى الدنيا..

صحيح.. كنت بتقولهالى بحب.. ديه مش شتيمة بجد..

ده كان دلع..

قالولي: زعلت.. إنك خلفت بنت.. فى عرفكم البنت عار..

جوايا 100 سؤال وسؤال..

البنت عندها مشاكل.. وكفاية قوى إنه هيخليكى تكملى تعليمك..

إوعى تنسى.. إن البنت كانت طول النهار محبوسة فى الدار..

تروح المدرسة، وترجع تانى على الدار..

بنات الناس.. ميطلعوش يلعبوا فى الشارع.. لينا قوانينا..

تقريبا كان عندى 11 سنة.. وحملتونى مسئولية بيت 3 أدوار..

أقولك إيه.. بص يا حاج..

من النهارده.. متقوليش يا بت..

أول مرة أرد فيها عليك..

بستناك كل يوم ورا الباب.. وإنت راجع..

بستنى.. هديتى منك..

حلم سعادتى.. تجيبلى معاك فطيرة بالسكر..

حلم السعادة.. بعد ما أخلص شغل البيت وأخلص المذاكرة..

أوريك النجمة المرسومة فى كراستى..علشان تقولى"شاطرة"..

بس متقوليش يا بت.. إنت بتنادى إخواتى بأساميهم..

وأنا تقولى.. يا بت..

بابا.. خلينى أكمل تعليمى..

لو آخر جلابيه عندى هتكملى..

بكره هوريك البنت.. اسمى هيكون على كل لسان وتتشرف بيه..

ليه مكنتش شايفنى يا بابا.. خدت على الرجالة فى البيت..

أنا اللى كنت بعملك كل حاجة.. وكنت بستناك..

قلت عاوز تشوفنى أحسن واحدة فى الدنيا..

أنا هكون ملكة على عرش مفيش زيه فى الدنيا كلها..

لما آجى.. ألعب معاك.. تقولي: إنتى كبيرة..

يا بابا..

أنا بنت.. مش الست اللى شيلتوها البيت..

إنت مبقتش تلعب معايا زى زمان ليه..

خرجنى معاك.. فى إيدك.. حتى خلينى أجبلك الأكل.. عايزه أشوف الشارع..

إنت ليه شوفتنى ست، وأنا كنت لسه بنت صغيرة..

أنا.. هكتم حزنى.. حاضر يا بابا..

وأقف على رجلى.. وهبنى نفسى بنفسى..

حاضر يا بابا..

بس كان نفسى.. تكون معايا..

تعرف يا بابا.. إنت وحشتنى..

نفسى أحكيلك على حاجات كتير..

وحاجات قابلتها.. واتعلمتها لوحدى..

تعرف يا بابا.. أنا اتعلمت ألعب لوحدى..

وعملت لعبة.. ألعبها لوحدى أو مع حد..

بس أكتر من واحد.. هيبكى..

وعرفت إن أيام الفرح قليلة.. وتعدى بسرعة..

والذاكرة بتفتكرها فى ثوانى..

وتحكيها فى ثوانى..

بس أيام الحزن كانت أطول وأصعب..

عارف اللعبة اسمها إيه..

لعبة الحزن.. 

أكتر يوم حزنت فيه كان إيه..

يوم ما قالولى.. خلاص بابا مات..

وحشتنى رغم البعاد..

تعرف نفسى دلوقتى أغلط.. علشان تقولى عيدى السطر من الأول..