أرفض العودة له.. أبرز تصريحات شيرين فى حوارها مع الجمهور
أجابت النجمة شيرين عبد الوهاب على أسئلة الجمهور عبر حسابها الرسمي بموقع الصور والفيديوهات «إنستجرام» في الساعات الأولى من صباح اليوم.
وأجابت شيرين على العشرات من أسئلة الجمهور أيضا الأسبوع الماضي وكشفت من خلال تصريحاتها العديد من كواليس حياتها الشخصية والفنية، كما كشفت حقيقة علاقتها وطلاقها بالمطرب حسام حبيب.
ويرصد «الدستور» في التقرير التالي أبرز رسائل شيرين لـ حسام حبيب وبناتها ولنفسها خلال لقائها مع الجمهور:
لسه بتحبي حسام ولا خلاص قدرتي تشليه من قلبك؟
أنا مش بحبه ولا بكرهه.
لو حسام طلب منك ترجعيله هتقبلي ولا ترفضي؟
أرفض طبعا.
عايزه تغيري إيه في حياتك أو تعدليه؟
الحمد لله أنا راضية عن حياتي وبغير حاجات بسيطة في روتيني اليومي عشان أكون سعيدة وأنشط.
هوايتك إيه بعيد عن الغناء والتمثيل؟
الطبخ والتلوين
شيرين ليه مختفية؟
في حاجات بحضر ليها واخدة وقتي وامتحانات الولاد في معسكر مغلق في البيت والاستوديو ومختفية فين ياحبيبتي أنا لسه كنت معاكم في رمضان.
كم نسبة الرضا اللي وصلالها شيرين دلوقتي بالنسبة في حياتك الشخصية؟
اللهم ما لك ألف حمد وشكر أنا راضية بكل اللي ربنا كاتبة ليا.
نفسك في إيه الفترة الجاية؟
نفسي نشاطي الفني يكون أنشط عن دلوقتي.
شيرين أنا لسه خارجة من علاقة ومش قادرة أدي الأمان لحد تاني.. أعمل إيه؟
أنا زيك بالظبط فتعالي أنا وانتي نقوي بعض ونساعد بعض ونجمد بعض.
عديتي الاكتئاب ازاي؟
بالصلاة.
لما شيرين بتعدي بمشكلة كبيرة بتتماسك إزاي وبتصبر نفسها إزاي؟
بالتفكير الإيجابي والشغل بينسي.
في أي وقت أو عمر ممكن تزوجي بناتك ما هو السن المناسب للزواج؟
بصراحة أنا من أولوياتي وأولوياتهم الدراسة وإنهم يشتغلوا ويكون عندهم كارير بعدها هي هتعرف تختار شريك حياتها صح
لو غلطة صلحتيها تفتكري حياتك كانت هتكون أحسن وغير؟
اللهم لا اعتراض أنا راضية بكل حاجة.
إيه أكتر درس اتعلمتيه في حياتك؟
مديش ثقتي لحد
هل بتسامحي اللي أذاكي؟
مش على طول بس بأخذ وقتي ولما أسامح بسامح بجد وعلى فكرة التسامح بيفيد صاحبه جدا.
