مدحت تيخا عن مشاركته تامر حسنى فى فيلم «بحبك»: أحلى صوت ومخرج متمكن
علق الفنان مدحت تيخا عن مشاركته النجم تامر حسني في فيلمه الجديد “بحبك” مع النجمة هنا الزاهد بمنشور عبر حسابه الشخصي على موقع التواصل الاجتماعي "فيسبوك"، مع مجموعة من الصور من الكواليس.
وعلق تيخا على الصور وكتب: “طبعًا أنا مش عارف أكتب إيه ولا إيه عن النجم العسل الجميل ده .. على المستوى الشخصي.. أخلاق ورقي وأدب وخفة دم مفيش زيها، وطبعًا نجم الجيل وأهم نجم في الوطن العربي كله وأحلى صوت في الدنيا، بس أنا هكتب عن حاجة جديدة عنه وهي تامر حسني "المخرج" لاقيت مخرج شاطر جدًا، مجتهد، متمكن، فاهم كويس جدًا بيعمل إيه، مهتم بتفاصيل كل شىء، وكأنه مخرج من زمان الحمد لله، وبشكرك يا تامر أنك وثقت فيا.. فيلم (بحبك) تأليف وإخراج وبطولة السوبر ميجا ستار تامر حسني، والنجمة القمر هنا الزاهد، والعسل اللي بيموتني ضحك حمدي الميرغني، والعبد لله مدحت إسماعيل، بسم الله ما شاء لا قوة إلا بالله.. بإذن الله نجاح محدش شافه قبل كده.. يا رب".
وكان النجم تامر حسني كشف عن الصور الأولى من كواليس العمل الجديد، من خلال منشور له على الصفحة الرسمية على "فيسبوك"، معلقًا: “مساء الهنا على أغلى ناس على قلبي.. أنا دي صور من أول يومين تصوير لفيلمنا الجديد (بحبك) طبعًا في ناس هتقرا اسم الفيلم بحبِك وناس هتقراه بحبَك دا طبعًا مقصود عشان في دراما الفيلم هنبحث طول الوقت عن مدى صدق كلمة بحبِك من الرجل للأنثى وبحبَك من الأنثى للرجل في أحداث فعلاً محيرة جدًا”.
وتابع: “الفيلم أكيد فيه ضحك بس في إطار رومانسي بحت مش موجود بقاله كتير، اتشرفت بمشاركة نجمة اليوم والمستقبل الجميلة هنا الزاهد، ومبسوط إني أول من اكتشفها في بداية حياتها، وفي الفيلم دا بكتشفها تاني وبقدمها بشكل جديد عليها وعليكم، ومبسوط جدًا لمشاركة حبيب قلبي نجم الكوميديا الكبير حمدي المرغني اللي هيعمل إن شاء الله شغل رهيب في الفيلم كعادته الجميلة، وللأسف لسه مصورش علشان أنزل صوره بس في أول يوم تصوير له ههريه صور".
