خالد عليش: بسبب زيادة حالات الطلاق في اطفال كتير بتدمر نفسيا
أعرب الفنان خالد عليش عن استيائه الشديد بسبب تأثر الأطفال بمشاكل الأسرة وحالات الطلاق التي زادت خاصة خلال الفترة الأخيرة.
وحاول «عليش» إيجاد حلول فشارك منشور له عبر صفحته الرسمية على «فيس بوك» قائلًا: «في حالة الخلاف الأسري الحاد وعدم وجود من يُحترم رأيه في العائلة لأي من الطرفين وعدم القدرة على حل المشاكل الأسرية وديًا والوصول لحائط مسدود لسوء تنظيم المسائل الأسرية بعد الانفصال خصوصا في وجود أطفال، يتم اللجوء للقانون وطلب حق الرؤية المشروع للأب، وفي حالة إنصاف القانون ليه أوي.. هيقدر ياخد حوالي كم ساعة يشوف فيها الطفل في مكان عام بشروط معينة مع وجود الأم اللي بينه وبينها حالة خلاف أصلا».
وأضاف: «إزاي ممكن يكون فيه تربية سليمة لطفل بيشوف أبوه كم ساعة في الأسبوع وتعنت الأم إنه حتى يوصل لأبوه تليفونيا، إزاي يكون في تربية سليمة لطفل مش بيبات في حضن أبوه يوم واحد في الأسبوع حتي، إزاي يكون في تربية سليمة لطفل القانون بيدي لأمه كل حقوقها كاملة ومش بيدي لأبوه غير أنه يشوفه كم ساعة وفي حالة امتناع الأم ورفع دعوة إسقاط حضانة توديه مرة وكأن شيء لم يكن وتبدأ الرحلة من جديد في طلب الرؤية والطفل هو الخسران الوحيد، إزاي طفل يعيش مبسوط وهو مش عارف يخرج أو يسافر أو يتفسح مع أبوه ولا حتى أبوه يكون ليه حق ياخده من المدرسة غير بإذن الأم عشان لو حصل يعتبر الأب خاطف لابنه».
واستكمل: «إزاي أب يستحمل إنه مش عارف يشوف ابنه وعمال يتفرج عليه على فيسبوك مع أمه في حفلات وسفر وغيره، عشان قرر ينفصل عن أمه يكون عقابه ما يشوفش طفله يعني حق ربنا سبحانه وتعالي اداهولنا واحنا بنعاقب بعض عليه، ليه الست دائما مظلومة ؟؟، ليه رواية الست دائما صح ؟؟، ليه الست تصمم تصرف مصاريف ملهاش أي تلاتين لزمة بعد الانفصال على الأولاد ماكنتش بتتصرف قبل كده لمجرد الادعاء بأن الأب يمتنع عن الدفع !!، ليه الفيمنيست مصممين أن الست صح حتي لو مبهدلة ابنها ومانعة أنه يشوف أبوه ؟؟».
وتابع: «الاجتهاد في تربية الأم للطفل وأنه يروح تمارين كلها مهمة بس أنه يشوف أبوه أهم بكتير، الجملة الشهيرة دائما بتقول إن القانون مع الست طب جدة الطفل وعمته مش ستات حقهم هما كمان يشوفو الطفل اللي هو حتة منهم برضه، متشجعوش أم مانعة أب يشوف ولاده خصوصا لو بيصرف عليهم كويس أوي ومدخلهم أحسن مدارس عشان الطفل هو الوحيد الخسران في العند بينهم».
واستطرد: «أرجو من الجميع لما أي أم تتكلم قدامك وتقول أصله ما بيشوفش باباه قولها روحي انتي وديهوله عشان حساب ربنا أقوى من أي حد، نصيحة كمان مهمة متطلقوش ومعاكم أطفال في حالة عدم وجود لغة حوار بينكم عشان أكيد مش هيكون في لغة حوار بعد الانفصال، الأفضل عيشو تعساء عشان العيال».
واختتم: «أخيرا، ده مش بوست شخصي بس مهم الدولة تهتم عشان مع زيادة حالات الطلاق في اطفال كتير بتدمر نفسيا من الأب والأم وعندهم مع بعض وحسبي الله ونعم الوكيل».
