عمرو محمود ياسين يرد على اتهام كتابة «نصيبى وقسمتك» خلال مكتب خارجى
شن الفنان والمؤلف عمرو محمود ياسين هجومًا على أحد الأشخاص الذي اتهمه بأنه كتب حكايات مسلسله الأخير "نصيبي وقسمتك" بموسمه الرابع من خلال كُتاب بمكتب خارجي، وأنه ليس هو صاحب السيناريو والحوار لتلك الحلقات، وبعد أن رد عمرو على منشوره بموقع “فيسبوك” اضطر هذا الشخص لمسح المنشور، مما دفع عمرو لكتابة الرد على حسابه الشخصي.
وقال عمرو ياسين، في رده عبر “فيسبوك”: "الأستاذ المحترم ده كان منزل البوست ده لما جيت أرد قام ماسح البوست، أنا رديت الرد اللي هتشوفوه ده.. بس هو مسح البوست معرفش ليه كان عجبه البوست طول ما أنا مش قادر أرد عليه أول ما رديت قام مسحه، عمومًا ده كان ردي".
وبدأ رده بـ"يا أستاذ يا أستاذ يا محترم، أصعب شيء بالدنيا إن ييجي حد يبقي عايز يمحو تعبك ومجهودك بالشكل ده، وطبعًا يعني كان لازم طالما ناوي تشكك فيا بالشكل ده كنت تراجعني أولًا، جميع قصص نصيبي وقسمتك من سيزون 1 لسيزون 4 من تأليفي منفردًا، بمعنى إن مفيش حد اداني قصة أو فكرة ولا استخدمت ورشة لمساعدتي في الكتابة، إلا في قصتين اتنين عبر الأربع مواسم، حكاية اسمها جدول الضرب كانت في سيزون 2 وحكاية أنسى روحي وياك في سيزون 4 الحكايتين دول فقط اللي كنت استعنت بورشة، المرة الأولى في حكاية جدول الضرب لضيق الوقت وكنت بقول لهم تتابع الحلقة ويكتبوا المشاهد ويبعتوها أقوم أنا مراجع المشاهد تاني اللي أنا قلت عليها وأعدل بالحوار، مرة تانية وأراجع الحلقة وبعدين أطلعها".
وتابع: ونفس الشيء في حكاية أنسى روحي وياك بقول سيناريو الحلقة وتسلسلها وتتابعها وسبهم يكتبوها ويبعتوها وأقعد أراجع على الحلقة بالخمس ساعات وأعدل فيها، وبعدين أبعتها، وده حصل في حكاية وأنسى روحي وياك فقط لا غير.. في هذا الموسم.. وإن كانت برضه أنا اللي كاتبها ومتحمل مسئوليتها لأني براجع على حرف حرف فيها".
واختتم: "خلي بالك انت ببوست زي ده. بتهد مجهود وتعب، انت لا تتصوره.. أي حد شارك في نصيبي وقسمتك يعلم جيدًا مين اللي كتبه كله، أي شخص أي فرد.. عارف كويس اللي بقوله، ميصحش كدة يا أستاذ.. ده كان ردي على الأستاذ المحترم اللي معرف نفسه إنه كاتب يعني مفترض عارف وفاهم يعني إيه تعب ومجهود المؤلف عيب يا أستاذ والله".
